Klubb saknar større deltaking blant dei eldre
Medan det minkar på dei eldre utøvarane, lèt ikkje dei yngste seg stoppa av litt regn då sesongens fyrste friidrettsstemne vart arrangert i Strandebarm onsdag.
Vêrgudane spela ikkje heilt på lag då Strandebarm Idrettslag stelte i stand stemne på friidrettsbana måndag. Fleire tydde til både regnklede og støvlar. Andre ikkje såg ut til å bry seg like mykje, og stilte opp i joggesko og shorts.
Gav meirsmak
Deltakarane sprang 60 meter, 200 meter, hoppa lengde i sanden og kasta på spyd. Innsatsen blant dei yngste var det lite å seia på.
– Dette er veldig kjekt! seier Oline Gjerdevik.
Den ni år gamle jenta hadde teke turen frå Øystese til Strandebarm saman med faren. Ho fortel at ho ikkje driv aktivt med friidrett, men at ho hadde lyst til å prøva seg. Konklusjonen etter at ho var ferdig med øvingane, var enkel: Det vert meir friidrett i framtida.
– Saknar dei litt eldre
Kring 25 personar deltok på det lokale stemnet i Strandebarm, som er eitt av to seriestemne i vår, opplyser Knut Øystein Fosse, som er med i styret i friidrettsgruppa.
Alle deltakarane på stemnet var born som deltok i rekruttklassen og aldersklassane frå 10 til 12 år. I dei eldre klassane var det skralt frammøte. Slik har det vore dei siste åra, fortel Fosse.
– Me saknar dei litt eldre deltakarane — dei minkar det på. Det er utfordrande å få dei til å halda fram med idretten, seier han.
Ifylgje Fosse har ikkje klubben ein klar plan for kva som må gjerast for å snu trenden, men han vonar at talet på eldre utøvarar vil ta seg opp.
Neste stemne vert i slutten av mai. Det store høgdepunktet for klubben vert Hardanger Friidrettsfestival på heimebane 18.–19. juni. Då vonar Fosse at mange vil ta turen, både lokale og frå andre stader i landet.
