Klinka til i NM i karate
Mathias Vik (13) kan sjå attende på ei helg fylt med gull, sylv og eit blått auga.
Då Bjørgvin Karateklubb arrangerte NM i karate laurdag, var Vik einaste deltakar frå Kvam Karateklubb på Bønes Arena. Han stilte i klassane kata og kumite.
Gull, sylv og blått
Fyrst på programmet var kata, der deltakarane har øvt inn eit bestemt mønster som dei går. Allereie i den fyrste kampen slo Vik ut sin største konkurrent, fortel pappa Rohnny Vik. Då tre kampar var gjennomførte, kunne Mathias til slutt stilla seg øvst på pallen for å ta imot gullmedaljen.
13-åringen fekk ikkje kvila lenge på laurbæra. Få timar etter sigeren i kata stod kumite for tur. Då Vik var ferdig med kampane, kunne han på ny ta steget opp på pallen og få sylvmedaljen rundt halsen — denne gongen med eit blått auga, ifylgje Vik.
Vik fortel at resultatet i helga var over all forventing.
— Mathias var så roleg før konkurransen. Det er heilt imponerande. Det var eg som stod og skalv, fortel han.
Takkar trenarane
Vik ynskjer å retta ein ekstra stor takk til trenarane. Han tykkjer det er stort at den vesle karateklubben i Kvam hevdar seg i toppen på større arrangement. Særskilt hovudtrenar Helge Fonneland Bu fylgjer sonen tett opp på treningane, fortel Vik.
To av dei andre trenarane, Lance Blaauw og Bjørn Vik, møtte begge opp på meisterskapen på Bønes. Ifylgje Rohnny Vik syrgde dei for at 13-åringen fekk tett og god oppfylging.
Tida framover vert spanande, seier Vik. Han fortel om ein svært motivert son som ikkje berre brukar mykje tid på å trening, men som også nyttar noko av fritida til å læra seg japansk.
