Klare for stort stemne

Syskena frå Tørvikbygd har ikkje drive med skyting lenge, men tek sats og hoppar i det når dei legg seg på standplassen på arenaen for årets skyttarhøgdepunkt. Båe skal delta i nybyrjarklassen. Faktisk vert det debuten deira i konkurransesamanheng, om ein ser bort frå nokre mindre tevlingar på heimebanen i Vangdalsåsen.

Tommy meiner å hugsa at han byrja skyta så smått i 2019, etter å ha delteke på ein skyteskule.

– Eg syntest det var veldig kjekt, for det var mange andre i klassen min som hadde begynt før, seier han.

Dei fleste andre har falle av, men Tommy held stand på standplassen. Skyttarsyskena synest det er kjekt å vera med på treningar, som går føre seg på onsdagane.

– Men det er mest skyting det går i, seier Tommy.

Han skyt links. Det inneber at han held geværet med høgre arm og siktar med hjelp av venstre auge.

I fjor kom veslesystera etter, sidan ho likevel var med broren på treningane og hadde slikt å gjera. Nona var litt skeptisk til dei høge smellane på banen i starten, men det har gått seg til. Ho trefte ganske godt heilt frå starten, fortel ho.

Nesten heilt i hundre

Skyttarlaga i både Kvam og Jondal melder om rekorddeltaking i år. Frå Hardanger Skyttarlag reiser 64 og frå Jondal Skyttarlag 35 skyttarar til Voss. Dei utgjer nær 2,4 prosent av dei 4.144 påmelde deltakarane.

– Det er veldig, veldig bra. Eg trur me er mellom laga med flest deltakarar, seier leiar Arve E. Kolltveit i Hardanger Skyttarlag til HF.

Han opplyser laget har lagt seg litt i selen – eller kanskje reima – for å få nybyrjarar og rekruttar til å melda seg på. Også nokre vaksne nybyrjarar – og slike som har skote for lenge sidan og har pussa støv av hobbyen – er med.

Junior med voner

Relativt fersk leiar Jarle Harkestad i Jondal Skyttarlag er i den sistnemnde kategorien, og har ei rifle som han nyttar med både grovt og fint kaliber, alt etter sesong. Så langt driv han berre med feltskyting utandørs.

Medan han kan reisa til Voss utan det heilt store presset, må nok Liv Sollesnes som vanleg leva med både forventingar og NRK-kamera. Jondal har fleire, til dømes juniorskyttar Kristine Solheim Wikane, som kan hevda seg i nasjonal samanheng.

– Me håpar på gode enkeltresultat og finaledeltakingar, seier Harkestad.

I Kvam er ein av dei trugne konkurrentane til Wikane, Jonas Bjørke, mellom dei som kan koma høgt på resultatlista om han presterer som han hatt for vane i år. Junioren skyt ei rekkje konkurransar, men trenar ikkje så mykje utanom, fortel han.

– Eg får håpa det går like godt som det har gjort før i år, seier han.

Også resultata til Kjetil Skår i klasse 5 og veteran Arne Berge i klasse V73 gjev von om gode prestasjonar. Skår presterte nyleg 350 poeng på eit stemne i Lerum Cup i Sogn.

– Me håpar å koma i ein eller annan finale, seier Kolltveit, som ottast at den arbeidskrevjande avvikling av noregscupen denne veka kan gå litt ut over resultata på Voss.

LS-stemninga

Både frå Jondal og Kvam skal ein del av skyttarane på bu campingplass på Voss, sjølv om reisa er kort. Kolltveit trur om lag 15 bubilar og campingvogner tilhøyrande skyttarar i laget har fått plass.

– Dei vil ha «LS-stemninga», og då må di bu på campen, konstaterer Kolltveit.

Frå båe skyttarlaga skal fleire skyttarar hjelpa Voss og gjera dugnadsarbeid under tevlinga. Liv Sollesnes har plass i skyttarstyret, noko som påfører henne diverse gjeremål. Chris-André Bolstad Fauske i Hardanger får sysselsetjing som nestleiar i rekrutteringsutvalet til Det frivillige skyttarvesen.

Fire skyttarar er plukka ut til å representera Hardanger og Voss i samlagsskytinga på Voss: Bjarne Sollesnes, Dag Skår, Kjetil Skår og ankerkvinne Liv Sollesnes.

Debuterer i felten

Då HF trefte syskena Augestad i Vangdalsåsen onsdag 19. juli, skulle Tommy prøva seg på feltskyting for fyrste gong. Han skal nemleg skyta både på banen og i feltløypa på Voss. Deltakarane i klassen til Nona skyt berre på banen.

– Me tek det som moro, konstaterer pappa Lars Audun Augestad, som ikkje er aktiv sjølv og har bilkøyring og yting av moralsk støtte som primæroppgåver.

Tommy må møta til såkalla opprop sundag og måndag klokka 8.30. Nona må opp endå tidlegare, for hennar opprop er klokka 7.30. Lars Audun reknar med å stå opp i femtida. Planen er å reisa til og frå Voss kvar dag.

– Eg kjem sikkert ikkje til å vakna, seier Nona.