Klare for NM i vassklie
To menn og to kvinner skal representera Hardangerbadet i noregsmeisterskapen i vassklie.
Det vart klart etter at kvalifiseringa gjekk av stabelen i Hardangerbadet torsdag 22. februar. Badevakt Tristan Holt hadde ansvaret for arrangementet. Han fortel at det var til saman ti deltakarar. Dei fire raskaste gjekk vidare til NM, som vert arrangert i ADO arena i Bergen 6. april.
Johan Larsen Aksnes (4,75 sekund) og Glenn Tommy Rudd (4,87) var dei kjappaste mennene. Live Tonning Kjøsnes (5,48) og Anette Børve Steinstø (5,58) var raskast av damene.
– Stemninga var god, og det var ikkje noko å seia på konkurranseinstinktet til deltakarane. Sidan me sender heile fire representantar denne gongen, håpar me på gode resultat i Bergen, seier Holt.
NM i vassklie vert arrangert av interesseorganisasjonen Badelandene.no, som Hardangerbadet er medlem i. Tevlinga har vorte arrangert kvart år sidan 2013. Dette er tredje gongen Hardangerbadet deltek i den nasjonale tevlinga.
