Klar for ny sesong

Kvam Langrenn- og Skiskyttarklubb vart stifta i år 2000 gjennom eit samarbeid mellom Øystese, Norheimsund og Ålvik. Sidan har han bygd opp eit miljø både for nybegynnarar og erfarne utøvarar, med base på Sjusete.

Nyleg var utøvarar på Geilo for å konkurrera i både langrenn og skiskyting. Klubben stilte med ein brei tropp, frå åtteåringar til vaksne.

Vått, men godt

Me har teke turen til Sjusete ein treningstorsdag tidleg i desember. Silje Laupsa Mo, som er klubbleiar, tek imot oss på den opplyste standplassen. Regnet er i ferd med å gå over til sludd.

Mo har vore i styret i ulike roller i over fem år. Ho fortel med iver at i denne sesongen ynskjer klubben å blåsa liv i «open klasse» i serierenna i langrenn, med to renn i klassisk stil og tre i fristil for alle aldrar og nivå. Tanken er at det skal vera eit lågterskeltilbod.

Inne på skistadionen er det fullt opplegg, og folk i alle aldrar er til stades. Me er inviterte til å få eit innblikk i klubbaktivitetane. På skytebana høyrer me gjentekne smell frå salongriflene som skiskyttarane nyttar både i trening og konkurranse. Samtidig ser me fleire i godt driv rundt i løypane. Snøen har ikkje lagt seg, så førebels har dei joggesko på beina. Dei vert bytte ut med ski så snart snøen kjem.

Tryggleik er viktig, og det må alltid vera ein vaksen til stades under skytinga. Utøvarane har i tillegg fått god opplæring i handtering av våpen og respekten krevst.

– Kjekt i kulde òg

Klubben arrangerer faste treningar frå 2. klasse til og med ungdomsgruppa. For mange handlar det om gleda av å få vera med. Foreldre som er til stades, fortel om kor viktig skigleda er for borna og korleis fellesskapen styrkjer det sosiale miljøet.

Skiskyting og langrenn byr på utfordringar og meistring, og utøvarane lèt seg ikkje skremma av kulde. Synneva Laupsa Mo, ein av dei aktive medlemene i klubben, seier det er utfordrande når det er kaldt. Men sjølv i dei lave temperaturane synest ho det er kjekt, og deltakarane kjenner på motivasjon og meistring.

Etter ei vellukka helg på Geilo ser klubben fram til fleire arrangement utover vinteren. Om kort tid dreg aldersbestemte utøvarar på treningssamling til Ål, medan junior- og seniorløparar reiser til Lygna for å delta i noregscupen.

Klubben har også serierenn og idrettsskule for dei minste. I tillegg legg han til rette for aktivitetar året rundt. Om sommaren er eit av høgdepunkta Lysebotn opp og langrenn og skiskyting i Sandnes sentrum i august.

Journalistane er mediefagelevar på Framnes Kristne Vidaregåande Skule. Red.