Kjempa om dronningtittel i sanden
Ein kneskade førte til at Sunniva Helland-Hansen spela den siste sandvolleyballturneringa for sesongen med ny makker. Det viste seg å gå langt betre enn venta.
Då turneringa Queen & King of the Court vart spela i Doha i Qatar denne veka, var Helland-Hansen blant dei som kjempa seg heilt til finalen som vart spela laurdag kveld. Saman med slovenske Tjasa Kotnik sikra ho seg bronse i sesongavslutninga.
– Eg er veldig imponert over innsatsen til Tjasa og kjemien vår på bana. Det me skapa i denne turneringa, kjem eg til å ta med meg vidare, seier kvemmingen.
Endra planane
Helland-Hansen skulle delta saman med makker Emilie Kløvfjell Olimstad, men planen vart endra då ho for nokre veker sidan pådrog seg ein kneskade.
Dimed måtte kvemmingen kort tid før turneringa prøva å finna ein erstattar. Det var ikkje berre enkelt, seier Helland-Hansen. Sidan ho sjølv er forsvarsspelar, var ho på leit etter ei som kunne spela i blokk. Dessutan ynskte ho ein makker som var god nok til at dei kunne vera med og kjempa om medalje, forklarar ho.
Kvemmingen hadde hell i uhell. Ho fekk høyra at også ein blokkspelar frå Slovenia, Tjasa Kotnik, var utan makker. I desse turneringane er det lov å delta saman med spelarar frå andre land, forklarar Helland-Hansen. Dette førte til at nordmannen og slovenaren danna ein duo.
Hadde kort tid på seg
I turneringa fylgjer spelarane eit rotasjonssystem. I kvar runde spelar fem lag mot kvarandre. Tevlinga startar med puljespel, der det beste laget i kvar pulje går direkte vidare til semifinalen.
Makkerparet fekk éin treningsdag saman før puljespelet onsdag. Den norsk-slovenske duoen viste god evne til å omstilla seg, og vann den fyrste runden.
Helland-Hansen og Kotnik fekk éin dag saman med trening og planlegging før semifinalen fredag. Dei to sandvolleyballspelarane vann, og vart eitt av fem par som fekk ein plass i finalen laurdag.
– Eg hadde håp om at me skulle spela godt saman, men eg kunne ikkje venta dette, seier Helland-Hansen.
Kvemmingen er godt nøgd med å runda av sesongen med ein plass på pallen.
– Sjølv om me kjempa om sigeren, er eg utruleg stolt over å kapra ein medalje med ein makker eg aldri har spela med før, seier ho.
