Kjempa i toppen i inne-LS

3 av dei 36 skyttarane frå skyttarlaga i Jondal og Kvam kvalifiserte seg for finalen sundag. Aller best gjekk det med Kjetil Skår frå Hardanger Skyttarlag, sjølv om han måtte tola å ramla nokre plassar ned etter dei 10 avgjerande skota.

Før finalen låg han nemleg på 4.-plass. Med ein kanonserie kunne han i teorien ha vunne klassane 3–5 og eldre junior. Det gjorde i staden tidlegare skyttarkonge Rasmus Løberg, som prikka inn 100 poeng og tok innersvingen på 17-åringen som var i teten før finalen.

– Det var steikjande moro, sa Skår etter den innleiande skytinga.

– Korleis har du ladd opp?

– Eg har trena heilt vanleg og skote nokre stemne. Så ikkje noko spesielt, seier Skår.

Berre nesten

Harald Brekke, også han i Hardanger Skyttarlag, prikka inn 246 poeng, men det heldt ikkje til å verta mellom dei 20 som fekk skyta finale i klassane 3–5 og eldre junior. Han vart nummer 22. Brekke seier resultatet var over all forventing, med tanke på treningsgrunnlaget hans.

Liv Sollesnes, Jondal, låg godt an etter 15 skot, men 96 på «grunnlaget» sende henne ned til 69.-plass. Like mange poeng, 244, fekk Dag Skår frå Hardanger, som enda på plassen over jondølingen etter 25 skot.

I finalen venta ikkje den tradisjonelle «omgangen» med 10 skot i liggjande stilling, men eit såkalla grunnlag med 3 skot i ståande, 3 skot i kneståande og 4 skot i liggjande stilling. Skytetida er 2 minutt.

Lysen avanserte

2 andre lokale heltar fekk skyta finale. Magne Lysen frå Hardanger avanserte frå 16.- til 11.-plass i V55 etter å ha prestert 97 i finalen. I den same klassen hadde Henry Øye frå Hardanger utur, då han vart fyrste som ikkje fekk plass i finalen.

Terje Mo Bjørklund frå Hardanger ramla 2 plassar til 19.-plass i klasse 2, etter 92 poeng i finalen og 336 poeng totalt. Han synest det gjekk veldig bra i den innleiande skytinga, og fortel at han ikkje var så nervøs. I finalen, derimot, «dunka det bra».

– Eg må trena meir på å skyta med dårleg tid. Eg hadde vel ikkje heilt venta å få vera med i finalen, seier han.

Tuva Lerfall Alvsåker, Jondal, var med 246 poeng berre 2 plassar frå finaleplass i juniorklassen.

I lagskytinga sundag kvalifiserte Hardanger 2 seg for finalen, der trioen Vegard Eide Aase, Magne Lysen og Dag Skår enda på 7.-plass etter at dei fekk høvesvis 99, 99 og 94 poeng.

– Eg hadde ein del puls til å byrja med, men etter eg såg at fyrste skotet vart ein niar, minka han, sa Aase etter den innleiande skytinga.

– Det er 1.500 på tribunen. Merkar de noko til dei?

– Ja, dei frå laget gaula kvar gong me skaut ein tiar. Det rista godt, sa Aase.

Det andre laget til Hardanger vart nummer 13 og Jondal nummer 54.

Kong Harald skulle vitja tevlinga i Trøndelag, men visitten vart avlyst fordi kongen er sjukmeld. 2.456 var påmelde til arrangementet.

Me gjer merksam på at journalist Sander Eide Aase, som har gjort intervjua i artikkelen, sjølv deltek i tevlinga som representant for Hardanger Skyttarlag. Red.