Kasta seg uti det: – Fin bane for nybyrjarar
Folk strøymde til frå både fjern og nær då Ålvik offisielt vart eit fritidstilbod rikare.
Diskgolfbanen – eventuelt frisbee- eller sendebrettgolfbanen – med 18 hol i området nord for idrettsplassen i bygda vart opna med brask og bram laurdag. Etter festivitasen ved Idrettshuset vart den aller fyrste turneringa i anlegget avvikla, med i alt 35 kort- eller langreiste deltakarar.
Fyrste turneringsvinnar vart Eivind Wengaard. Det overraska ikkje dei som har vit på det, for han skal vera av dei beste diskgolfspelarane i Noreg. Saman med fleire andre tok han turen frå Bergen til den nye banen.
– Det er alltid gøy med ein ny bane og nye hol. For meg er det spaninga som driv meg. Korleis skal eg løysa denne gåta på kvart hol? Når eg klarar å løysa henne, er det veldig moro, seier Wengaard.
– Kva synest du om banen?
– Han kan verta veldig bra, og er ein fin nybyrjarbane. Han har potensial, men som på alle nye banar er det ein del som kan justerast, seier Wengaard.
Les også:
Under pari og over par
Han kom seg gjennom løypa på 45 kast, som er 9 under samla par på 54. Alle hol i Ålvik har nemleg par 3, det vil seia at ein normalt god spelar vil bruka 3 kast på å få disken i korga. Wengaard tangerte den 3 dagar gamle løyperekorden til Dag Instanes frå Kvam.
Laurdag måtte kvemmingen ty til 52 kast for å koma gjennom dei 18 hola. Også han seier at nybanen er godt eigna for ferskingar, men at han i tillegg er fin for vidarekomne som vil trena på ulike kasteteknikkar. Fleire hol er relativt bratte, slik at ein får øvd på kast i både mot- og unnabakke, påpeikar han.
Mange fekk augo opp for diskgolf under pandemien i 2020–2021, sidan idretten kan utøvast utan stor smittefare. Instanes omtalar seg som ein typisk koronagolfar.
– Ein kompis hadde fått to–tre diskar til bursdagen, og spurde om eg ville vera med. Eg vart biten straks. Det er noko fasinerande med å kasta noko og sjå korleis og kor langt det flyr, seier Instanes og ler.
Han byrja sjølv med å kjøpa to diskar. No har han så mange at han må le av det. Dei vidarekomne kan lett plukkast ut etter storleiken på disksekken. For dess meir ein får teken på det, dess viktigare vert det med mange ulike diskar med ulike eigenskapar, påpeikar Instanes
Med seg til Ålvik hadde Instanes mellom andre kompis Markus Opsahl-Engen.
– Han kan du kalla makkeren min. Han er god, sjølv om han ikkje likar å seia det sjølv, seier Instanes.
Saman er dei del av ein gjeng som arbeider med ein ny bane i Tolomarka ovanfor Norheimsund. Det er uvisst når han kan vera klar, men vonleg kan det skje i sommar, fortel Instanes. Her er planen å ha fleire hol med litt større avstandar. Det inneber meir arbeid per hol – ikkje minst med skogrydding.
– Har kosta sveitte
Eivind Ringheim Århus fortalde før opninga dei frammøtte ved Idrettshuset ein del om baneprosjektet, som han sjølv tok initiativ til i fjor. Ålvik Idrettslag stilte opp og var samarbeidsvillig frå fyrste stund, og fagfolk hjå Aceshop hjelpte til med å forma banen og finna den rette traseen. Resultatet er eit anlegg til 550.000 kroner, der over halvparten gjekk til ei ny bru over Dalaelva. Brua var den største utfordringa, også tidsmessig, undervegs. Kvam herad tok på seg å rusta opp ei anna bru over elva.
Århus tippar at det kan ha gått med kring tre årsverk i dugnadstimar. Han sjølv og Harald Torheim, som er utnemnd til banemeister, står for ein god del av timane. Torheim fekk stor applaus for enorm innsats.
– Kvar meter har kosta sveitte, energi og planlegging, sa Århus.
Elkem Bjølvefossen er velvillig grunneigar i området. Leigekontrakten med idrettslaget gjeld i 30 år. Eigaren har rive den gamle skytebanen i området, som var ute av bruk og tilgrodd.
14 av dei 18 hola har utkastrampe, såkalla teepad. Desse har Idar Sjo Rysjedal bygt gjennom eige føretak. Ein liten elvepromenade mellom elva og Elvely er komen på plass med initiativ og innsats frå familien Gjelseng, som bur i eller nær Elvely.
For dei som vil prøva diskgolf utan å kjøpa diskar, vert det mogeleg å låna. Banen i Ålvik kan passa dei mellom 8 og 80 år, ifylgje Århus.
– Alle skal få testa, sa Århus.
Dei frammøtte fekk tilbod både om instruksjon og omvising i løypa. Ein del bilete frå sjølve baneområdet kan du sjå her:
