Kåra lagsmeistrar på Storemyr
Lagsmeisterskapen vart velsigna med strålande sol og skitilhøve sundag.
– Kjempesuksess, seier leiar Svein Olav Espeland i skigruppa i Jondal etter meisterskapen på Storemyr.
Ramma kunne knapt ha vore betre. Ei rekkje born og ein liten gjeng med vaksne deltok. Medan dei yngste berre gjekk ein runde «på myra» ved skihuset, gjekk dei litt eldre halve eller heile lysløypa. Dei vaksne gjekk tre gonger i heile løypa, mot normalt berre to i serierenna. Stilarten var fri.
Espeland fortel at det har vore forholdsvis god deltaking også på dei fire serierenna skigruppa har skipa til i januar og februar. Det varierer med vêret, konstaterer han. Snøtilhøva har vore stabile, og sjølv ikkje i ein lengre mildvêrsperiode nyleg forsvann snøen i løypa. Vêrmeldinga for den neste veke tilseier ikkje monaleg tæring på løypene med det fyrste.
Skianlegget held seg no med eiga trakkemaskin. Maskina som vart nytta i turskiløypa frå Vassenden til Fodnastøl, vart nemleg erstatta med ei ny i fjor og så flytta til Storemyr. Slik sikrar idrettslaget ypparlege løyper så sant det er snø.
Lagsmeistrar vart Stein Olav Ness og May Randi Haugen Selsvik.
Sjå fleire bilete frå meisterskapen her:
