Kan verta sykkelfaste på Kvamskogen
Sykkelrittet Bergen–Voss fører til einvegskøyrd veg over Kvamskogen laurdag. Det fell ikkje i smak hos alle.
Klokka 08.00 stengjer politiet det eine feltet frå Frøland i Samnanger til Norheimsund. Først klokka 11.30 vert det opna att. Det fortel dagleg leiar Christian Sortland i rittarrangøren Bergen Cykleklubb. Trafikken frå Kvam mot Samnanger vil gå som normalt.
Folk som skal til Norheimsund i perioden med einvegskøyring, vert oppmoda om å køyra via anten Voss eller via Mundheim.
Problemet er at Bergen–Voss ikkje er det einaste som skjer i Kvam denne helga. Mellom anna går den første av to helgar med Øystese Cup av stabelen. Det betyr at hundrevis av born og vaksne skal til Øystese for å spela fotball.
Sortland er klar over at rittet kolliderer med cupen.
– Eg veit at mange cupdeltakarar skal overnatta i hytter på Kvamskogen, og eg veit at det irriterer mange at dei vert «stengde inne» på Kvamskogen medan rittet passerer. Mitt råd er at dei køyrer til Øystese før vegen vert stengd. 1.600 syklistar skal over Kvamskogen denne føremiddagen. Me tek deira tryggleik 100 prosent på alvor, seier han.
Han opnar ikkje for unntak frå regelen.
– Dette må gjelda for alle. Me har søkt om og fått løyve til å arrangera dette rittet. Bergen–Voss har vorte arrangert den første helga i juni i 48 år. Rittet kan ikkje koma som ei overrasking på nokon, seier Sortland.
Han rår bilistane frå å trassa stenginga.
– Den som gjer det, risikerer å verta stansa og bøtelagd. Hugs at alle syklistane skal ned Tokagjelet. Der er det ein tunnel utan lys. Å ha bilar og syklistar i same felt ned Tokagjelet går berre ikkje, seier arrangøren.
