Kan starta bygging av frisbeegolfbane

Det opplyser prosjektleiar for banen, Eivind Ringheim Århus, i ein søknad til Kvam herad om bruk av eigedomen. Ifylgje han er det interesse for banen. Kvam herad arrangerte tidlegare i år eit møte med fleire frisbeeaktørar i Kvam, og det kan godt tenkjast at det kjem fleire banar i Kvam.

Det er i dag få tilgjengelege banar i Hardanger. Ved å laga ein bane med utfordringar for store og små har laget stor tru på at han vert godt vitja, både av ålvikarar og andre.

Ålvik Idrettslag (ÅIL) har inngått ein avtale med Elkem AS Bjølvefossen om bruk av området. Bjølvefossen er svært positiv til tiltaket, og har støtta det frå fyrste stund, fortel Århus.

– Kan bruka området saman

Rådmannen i Kvam godkjende måndag 11. september ei gangbru som ÅIL vil byggja over Dalselva. Ho skal knyta saman den øvre delen av den gamle skytebanen med gamle turstiar.

Dette er ein positiv bieffekt av prosjektet, påpeikar Århus. Frisbeegolfarar og turgåarar kan bruka området saman. Dette har vore ein ekstra motivasjon for å gjennomføra prosjektet for idrettslaget, ettersom området er eit sentralt turområde som er fullstendig gjengrodd per i dag.

Planen for å etablera banen er å saga ned tre og krattskog, rydda områda, setja opp bosspann, setja opp korger, etablera stiar mellom korgene og reparera gamle stiar.

Byggjekostnaden avheng av prisen på brua. Utbygginga kan koma på 200.000 kroner. Idrettslaget arbeider med å skaffa pengar.

– Me kan gjera banen så bra som me drøymer om viss me klarar å få nok stønad, skriv Århus til HF.

Laget ser føre seg at finansieringa vil koma frå lokale stønadsordningar og eventuelle sponsorar. Mykje av arbeidet vil verta gjort på dugnad, i dialog med ein profesjonell banedesignar.

Gratis å spela

Prosjektet vil utelukkande vera positivt for heile bygda og nærområdet om ein klarar å forma ein bane som tek omsyn til både friluftsområda og til spelarane, meiner Århus. Banen skal vera tilgjengeleg for alle, og laget ser per i dag ikkje føre seg at det skal kosta noko å spela.

Ålvik Idrettslag har fått god hjelp frå eit firma i Sandnes, og har tru på at ein kan avvikla lokale turneringar. Århus trur ikkje banen vert krevjande nok for profesjonelle spelarar, men trur han vil kunna by på spanande utfordringar for amatørar.

Ingen av traseane gjev permanente inngrep i naturen, og alt skal vera reversibelt om det skulle verta trong for å endra bruken, påpeikar Århus.

Idrettslaget og Århus planlegg i haust dugnad for å rydda og opna stiar i det aktuelle området.

Sterk bru

Brua over Dalselva vil verta åtte meter lang og om lag nitti centimeter brei, med rekkverk på båe sider. Materialet er limtre, og bjelkane vil ha monaleg overkapasitet. Det opplyser dagleg leiar Svein Roger Ivarsen i Ny Sti AS i Molde, som utfører bruprosjektet, i eit skriv til Kvam herad. Molde Engineering AS står for prosjekteringa.

Det vert truleg naudsynt å nytta helikopter til montering av brua. Ho vert flydd ut ferdig montert og sett på fundament, ifylgje Ivarsen. Han har vore på synfaring der brua kjem, saman med leiar av idrettslaget, Camilla Gangdal.

Heradet har etterspurt informasjon om flaumfaren i elva. Han meiner brua vil tola ein 20-årsflaum, men i ekstreme tilfelle bør ein vurdera å stengja henne. Det er lite truleg at brua vil valda skader om ho havarerer, skriv han.