Jondølingar deler diskkunne med Vestlandet

– Eg og tre barndomskompisar byrja spela litt før koronaen. Miljøet har gjeve oss så mykje og så mange vener at me følte me burde gje noko tilbake.

Det seier John-Inge Kysnes Skogseth frå gamle Jondal kommune, som bur i Bergen. Svaret han fann, heiter Bouncebackbirdie AS. Verksemda etablerte Skogseth saman med John-Håkon Butler Omdal, også han frå Jondal, og Ruben Haugsvær. Sistnemnde har vore mykje på hytte i Jondal og kjenner dei to andre godt.

Tanken deira var at distriktet ikkje har ein utsalsstad for diskar. Det ville dei gjera noko med.

Kasta seg uti det: – Fin bane for nybyrjarar

– Ein kan endeleg tinga på nettet, men der får du ikkje den personlege kunnskapen. Når du kjøper av meg, skal du få ei god oppleving, seier Skogseth, som òg sel ymse tilbehøyr og klede attåt dei importerte diskane.

Verksemda har lager på Nesttun i Bergen, og opnar dørene ein dag eller to i månaden. Der kan kundane både handla og få gode råd om utstyr og teknikk.

Detaljar

Ved den nye banen i Ålvik stilte han med eit rikt utval diskar frå sjappa, pluss eit utval spelarar han fekk med seg frå diskgolfmiljøet i Bergen. Dessutan prøvde han noko nytt: å kursa folk i å kasta. Interessa for å få instruksjonar var stor. Instruksjonane synte at det slett ikkje er berre å stilla seg opp og kasta i veg. Djevelen ligg i detaljane, som engelskmennene seier.

– Det ligg ein del vitskap bak, og det har gått med nokre timar til å lesa seg opp og forstå for å gje kundane dei beste råda, seier Skogseth.

– Kva er det heitaste tipset til nybyrjaren?

– Ta det med ro! Du hiv langt med god teknikk og treng ikkje ta hardt i. Og du bør ikkje gå for dei heftigaste diskane med ein gong, men kan starta med rolege diskar og få inn grunnteknikken. Så kan ein heller guffa på seinare.

– Held det med éin disk i starten?

– Ein kan klara seg med éin, men det er like godt å kjøpa tre, seier Skogseth.

Årsaka er at diskane har ulike eigenskapar og passar til å kasta ulike distansar. Både utforminga og plasttypen spelar inn, seier han.

Bane på heimebane

Skogseth hadde berre fått teke nokre få prøvekast på banen i Ålvik då HF snakka med han. Det finst elles banar på Framnes, på Omastrand, på Hatlestrand, i Odda, i Skare og ikkje minst i Jondal. Skogseth har spela ein god del på banen med ni hol nedanfor Sætveithagen, som han tilrår på det sterkaste å prøva.

– Det er ein veldig balansert og gjennomtenkt bane. Det er kjekt at tilbodet er kome i lokalmiljøet, seier han.

Rike vert bakmennene ikkje av bedriftsetableringa. Drifta er på rein hobbybasis. Bouncebackbirdie vart etablert i desember og omsette for 12.000 kroner før nyttår. Målet i år er å omsetja for 100.000–150.000 kroner.

– Treffer me så mange kjekke folk som her i Ålvik, skal me klara det, seier han.