Jondalsjenter er i gang med sesongen
Resultatmessig vart det tøft, men humøret tok ingen frå jondalsjentene på kvammatur torsdag.
Trenar Hildegunn Samland frå Herand fortel at 2012-kullet med jenter i Jondal ikkje har hatt lag før så seint som i fjor. Då stilte dei med lag, men jentene var nett litt få, så motivasjonen vart litt så som så.
I år ville jentene prøva på ny frisk – om dei berre fekk ein trenar på plass. Samland, som sjølv har ei dotter med på laget, tok ansvar då ingen andre melde interesse for oppgåva.
Ho har eit dusin spelarar i troppen, men det vert litt knapt til å spela på niarbane ettersom det alltid er nokon som er sjuk eller bortreist, fortel Samland.
For mange på laget er målet fyrst og fremst å ha det kjekt og sosialt. Resultata er mindre viktige. Difor held det med éi trening i veka attåt kampane.
– Ei sa at ho helst ikkje ville vera med på kampar. Dette er mest for gøy, seier Samland.
Torsdag venta årets fyrste kamp, mot Norheimsund/Øystese på bortebane. Heimelaget, som har monaleg fleire jenter per kull enn det jondalsbygda kan skilta med, opna sterkt og tok raskt leiinga med fleire mål, men jondølingane kom etter kvart meir med. Dei fekk ballen i nettet tre gonger, slik at det heile visstnok enda 11–3 til vertskapet.
Oppgjeret var det fyrste i ein lang sesong for jondølingane. 18 kampar står på terminlista – 10 før sommarferien og 8 i haust. Dei store forventingane resultatmessig har trenaren ikkje. Jentene skal møta lag frå Voss, Lofthus, Ulvik og Granvin i tillegg til kvemmingane.
– Det er greitt at det er i området og ikkje så langt å reisa for å tapa, seier Samland sjølvironisk og ler.
HF gjer merksam på at skribenten har ei dotter som spelar for J12-laget til Norheimsund/Øystese, laget jondalsjentene spela mot torsdag. Red.
