Ivrige «gamarar» i Øystesehallen

Tre døger i haustferien vart Øystesehallen nytta til såkalla LAN-party. Eit LAN er speling over ei viss tid der ein tek med seg utstyr og set seg i eit lokale. Deretter står ein fritt til å spela over lengre periodar i lag med andre, ofte deltakarar på LAN.

Kvam E-Sport arrangerte i år sitt tredje KvammaLAN, som strekte seg over 72 timar og er eit av dei større nettverkstreffa i området. Her er det mykje speling, leik, aktivitetar og prating.

Alle kan med

Til årets LAN var det 72 påmelde deltakarar, seier styreleiar i Kvam E-Sport, Hallvard Valland Nordheim. I tillegg til dei påmelde kunne kven som helst kjøpa ein billett under LAN, utan å melda seg på. Deretter kunne dei setja opp pc, skjerm, tastatur og alt anna utstyr dei ville ha med på pulten. Viss deltakarane mangla utstyr, kunne dei låna det aller meste av klubben. Til og med pc-ar vart lånte ut til deltakarar som ikkje hadde sjølve, fortel Nordheim.

Under LAN vart det arrangert fleire konkurransar og hendingar, til dømes i Fortnite og ein byggjekonkurranse i Minecraft. Innsatsen vart vurdert av ordførar Torgeir Næss, som var invitert for andre år på rad. I konkurransen byggjer deltakarane noko i spelet innanfor det aktuelle temaet og med ein viss storleik. Deretter vert resultata vurderte av juryen.

Andre konkurransar var køyrekonkurranse med den kjende «driftaren» Morten Lyngøy i bilsimulator. Deltakarane skulle elles ha aktivitetar som boblefotball og «lazer tag».

Deltakarane spela mykje forskjellig – alt frå Fortnite og Minecraft til Pokémon og Fifa. Bilsimulator og VR-sett kunne brukast av alle. Nordheim seier at deltakarane har full fridom til å spela kva dei vil så lenge aldersgrensa på 18 år ikkje vert broten, men at dei ikkje kan hindra dei over 18 i å spela slike spel. Andre reglar er at det skal vera ro i salen etter klokka 11, slik at dei som vil, får sova. Då vert musikken skrudd ned og ingenting går føre seg på scena.

Faste gjester

Martin Strandberg og Robin Herskedal reiste heilt frå Bergen for å vera med på KvammaLAN. Dei har vore årlege deltakarar sidan det fyrste treffet i 2022, då dei fekk høyra at det vart arrangert. Gutane seier at familien til Robin har hytte i området, slik at det er lettvint for dei å delta. Sjølv om dei ikkje kjenner mange frå før, seier dei at dei sosiale elementa framleis er ein stor del av det. Dei har vorte kjende med fleire.

Kvam E-Sport har prøvd å laga eit opplegg for born og unge som elskar speling. Klubben prøver å fokusera på det gode og det å gjera speling til ein sunn, aktiv og sosial aktivitet. Dei oppfordrar alle til å ta pausar og hadde aktivitetar utanfor spelinga både onsdag og torsdag. Heile poenget med arrangementet er å prøva å samla dei som likar å spela og laga ein møteplass for unge med felles interesse, seier Nordheim.

– Det er kjekt at alle er i det same rommet og gjer det same, seier Strandberg.

Hilmar Fosse Rise, Trym Bertil Skeie og Styrk Thunes Jensen seier til HF at det er bra stemning, kjekke folk og eit bra arrangement. Dei kosar seg med både «VR-settet» til e-sporten og på eigne pc-ar. Dei ser fram til dei sosiale elementa og kom til arrangementet i lag. Målet er å vinna tevlingar i fleng.

– Me skal grusa dei der små borna, seier Styrk.

Aktivitet og inkludering

E-sportklubben har hatt mindre LAN i både vinter- og påskeferiar, men det årlege treffet i haustferien er det største. Før deltakarane begynner å spela, er det mykje planlegging av aktivitetar, tidspunkt og logistikk som skal gå opp.

Ei av utfordringane med eit slikt arrangement er å skaffa nattevakter, fortel Nordheim. Vaktene er frivillige. Fleire er foreldre til deltakarar, medan nokre berre er spesielt interesserte.

Eit viktig moment for arrangørane er at det ikkje skal vera usunt å spela, og å prøva å byggja på sosiale element og leggja til rette for fysisk aktivitet der ein kan, seier Nordheim. Det set deltakarane pris på, fortel han.

Nordheim understrekar elles at klubben prøver å vera inkluderande og å tiltrekkja seg fleire jenter.