Iselin Bjørke (13) vart noregsmeister på Voss

Frå skive 24 fekk skyttaren 12 treff og 10 innertreff. Med det slo ho om lag 50 andre finalistar. Totalt deltok 230 skyttarar i klassen.

Som om ikkje det var nok, vart Ella Måkestad nummer 15, Ida Nybø Skogesal nummer 64 og veslebror Isak Bjørke nummer 70. Storebror Jonas Bjørke vart nummer 5 av 208 i juniorklassen. Dei fire er «lagkameratar» med Iselin i Hardanger Skyttarlag.

Sistnemnde tok til tårene då ho innsåg at tittelen var sikra. Bjørke seier til HF at tittelen «noregsmeister» ikkje var venta.

– Kva tenkte du då du innsåg at du vann?

– Eg tenkte ikkje så mykje. Men då eg var på scena, trudde eg at eg skulle detta.

Sigersmelodi

Med nokre få justeringar etter prøveskytinga gjekk det både fort og godt for den lokale skyttaren. Dei fyrste skota vart fyrte av i løpet av 30 sekund.

– Eg fokuserer på å skyta raskt og kontrollert. Og å treffa midten, seier Bjørke.

Etter å ha vore med på mange konkurransar, har ho vorte betre til å stengja nervøsiteten ute. Strandbermingen prøver å få alle tankar ut av hovudet før ho skal skyta. Bjørke har funne ein god metode for dette.

– Viss eg er nervøs, plar eg syngja inni meg, fortel ho.

Denne veka har det gått mykje i tonar frå musikalen «Hamilton».

Bjørke byrja med skyting for fire år sidan. Det var naturleg for henne å bli med, då både faren og brørne dreiv med sporten. Familien er med i Hardanger Skyttarlag.

– Me har eit kjempefint fellesskap på skytebanen! Det er ein inkluderande idrett. Folk i alle aldrar kan vera med, seier Bjørke.

Trongt nålauga

Det var ein relativt ny feltfigur det vart skote på. Figuren er asymmetrisk og måler 19x11 centimeter. 40 prosent av figuren gjev såkalla innertreff, og skyttarane låg 100 meter frå han.

– Figuren er frykteleg liten, så det skal ikkje mykje til for å få ein bom, seier Jon Olav Bjørke, far til den nye noregsmeisteren.

Årets var hans 20. «LS». Sjølv har han har aldri sikra seg ein finaleplass.

– Det har vore litt stong ut for min del, men det gjer ingenting når me har lokale vinnarar i andre klassar, fortel han.

Før dottera skulle i elden, prøvde Bjørke å halda forventningane nede. Då familien stod og venta på resultatet, vart det problem med poengskjermen. Det tok difor lang tid før det siste skotet kom opp.

– Iselin sat og rista og skalv. Spenninga bygde seg opp i kroppen min òg, seier Bjørke.

Då vinnaren omsider var kåra, kom gledestårene hjå den unge skyttaren.

– Korleis kjennest det å ha ein noregsmeister i familien?

– Det er utruleg stort! Og så er det kjekt å sjå at det betyr noko for Iselin. Det gjev inspirasjon til å satsa vidare, seier den stolte faren.

Mest sol, litt pøsregn

Han har fungert som trenar og manager for borna under Landsskyttarstemnet, i tillegg til å skyta sjølv og bidra som frivillig. Familien har pendla mellom Strandebarm og Voss heile veka.

– Me har køyrt nokre mil dei siste dagane, ja, seier Bjørke.

Han tykkjer skyting er sosialt og moro. Ifølgje han kan ikkje alle driva med fotball eller ski.

– Det kriblar litt ekstra i magen kvar gong ein kjem inn på standplass og ladar våpenet, fortel Bjørke.

Han tykkjer arrangementet på Voss har gått veldig bra. Med fungerande teknikk og få seinkingar har strandbermingen lite å klaga på. I tillegg var det fint vêr heile veka, utanom ei skikkeleg regnbye sundagen. Ho kom akkurat då Iselin Bjørke skulle gå feltrunden. Deltakarane gjekk rundt i pøsregn i 2,5 timar.

– Eg følte meg som ein våt katt, fortel 13-åringen.

– Eg tykkjer det er beundringsverdig at Iselin klarte å kvalifisera seg til finalen i utgangspunktet. Det var imponerande at dei fekk til å konsentrera seg om skytinga i det sure vêret, seier faren.

Familien måtte rett heim og hengja skyttarkleda til tørk i stova. Dei skulle jo på att neste morgon.

Nyt campinglivet

Arne Berge og kona, Nelly, måtte ikkje reisa like langt for å koma seg til skytebanen på Voss. Dei hadde nemleg installert seg i campingbil to meter frå stadion. I fjor fekk Berge ein 2.-plass på Landsskyttarstemnet. Denne gongen enda han som nummer 7 av 59, og gjorde det akkurat godt til å få medalje.

– Eg er veldig nøgd. Og så var det kjekt å sjå den fantastiske prestasjonen til Iselin! seier han.

I klassen eldre rekrutt vart Vegard Eide Aase nummer 30 og Mathilde Nonås nummer 43 i feltskyting. Båe representerer Hardanger Skyttarlag og kom seg til finalen.

Liv Sollesnes frå Jondal vart nummer 21 i klassane 2–5, V55 og eldre junior. «Berre» 4 innertreff i finalen tok frå henne vinnarsjansane. I klasse V55 vart Magne Lysen frå Hardanger nummer 9. I klasse 2 vart Jo-Bjørnar Håvik frå Jondal nummer 14.

I klasse 1, som skyt berre 25 skot på banen, vann Andreas Kvåle frå Jondal med 247 poeng i kamp mot 169 andre. I felthurtigskytingsfinalen gjekk broren Harald til den tv-sende finalen etter at han var den 4. beste etter den innleiande skytinga, men møtte tøff motstand og rauk ut undervegs.

Frivillige krefter

Ei veke med skytekonkurransar krev mykje arbeid. Teknikk, logistikk, tryggleik, mat, lister, stolar og skilt må vera på plass for at alt skal gå som det skal. Mange skyttarar skal i aksjon, og tidsskjemaet er stramt. Difor er det avgjerande med frivillige som stiller opp og bidreg. Fleire av dei kom frå Kvam eller Jondal.

Harald Brekke frå Hardanger Skyttarlag har vore med som standplassleiar i tillegg til å konkurrera sjølv. Ansvaret hans er å styra dataskjermane som viser start og stopp hjå kvar enkelt skyttar.

– Me hadde éin teknisk feil. Det ordna me fort. Elles har det gått knirkefritt, fortel han.

Brekke og familien har budd i campingvogn rett utanfor baneanlegget. Han tykkjer det har vore eit bra arrangement, og ser fram til Landsskyttarstemnet i Steinkjer neste sommar.