Intens og målrik heimekamp
Publikum fekk servert ein spanande kamp då samarbeidslaget Øystese/Norheimsund møtte Nordhordland måndag kveld.
Ei skåring av Kevin Matare i det siste minuttet sikra heimelaget eitt poeng i kampen. Stillinga vart 4–4.
– Det var god stemning og spanande å sjå på. Spesielt Øystese/Norheimsund spela veldig kjekk fotball, seier trenar Denis Ljubovic.
4.-divisjonslaget har kanskje ikkje hatt den beste starten på sesongen. Før kampen hadde laget 1 siger, 2 uavgjorde kampar og 3 tap bak seg. Men det er stor skilnad på laget frå den fyrste kampen til no, synest trenaren.
Kortvarig glede
Den fyrste halvtimen var det fleire gode sjansar frå begge lag. I det 30. minuttet førte sjansen fram for Øystese/Norheimsund-spelar Marcus Dalseide, som sende heimelaget i leiinga. Gleda viste seg å verta kortvarig.
2 minutt seinare vart det dømt straffe til Nordhordland. Tommy Gaustad skåra frå straffemerket, og det stoppa ikkje der. 3 minutt seinare sende Andreas Bøe Snekkevik motstandarane i leiinga.
41 minutt ut i kampen fekk Nordhordland-spelar Christopher Wallem Veland sitt 2. gule kort. Han vart med andre ord send i garderoben.
Slo tilbake
Då andre omgang byrja, hadde fleire i publikum teke turen heimover i regnvêret, men entusiasmen og intensiteten i begge laga heldt fram. Kvarteret inn i 2. omgang skåra Øyvind Berge sitt 1. mål for sesongen. Også den gleda skulle visa seg å verta kortvarig.
Berre 1 minutt etter skåra Nordhordland mål att. Denne gongen var det Joachim Rongved Smørdal som signerte skåringslista.
10 minutt før slutt var kampen langt frå over. Etter 80 minutt skåra Marcus Dalseide sitt andre mål i kampen. 5 minutt seinare bles dommaren i fløyta for nok eit straffespark til Nordhordland. Andreas Bøe Snekkevik gav motstandarane leiinga, som vara til siste minutt. Kevin Matare, som vart bytt inn kort tid før, skåra det siste og avgjerande målet i kampen.
– Betre og betre
Etter denne runden ligg Øystese/Norheimsund på 10.-plass av 12 lag i avdelinga. Framtida kan ingen spå om, men om samarbeidslaget held fram som måndag, har både trenaren og assistenttrenar Christian Kjosås trua.
– Laget har hatt god progresjon, og det er veldig mykje positivt å ta med seg vidare, seier Kjosås.
Ljubovic seier at han kanskje treng å jobba litt meir med den defensive strukturen, men påpeikar at laget har jobba hardt og no ser ut til å ha funne «sin» spelestil. Det vert betre og betre, seier han.
Neste kamp er fredag 26. mai. Då møter laget Odda, som ligg på 6.-plass på tabellen.
