Innbyr til andelslag i hest

– Endeleg er tida komen for å starta opp for meg sjølv. Eg har etter kvart vorte 25 år og køyrt 2.500 løp, vunne i underkant av 300 løp og køyrt inn 13 millionar kroner for hesteeigarane. Tida er inne for å stå på eigne bein, etter å ha vore hjå fleire av landets leiande trenarar gjennom fleire år, skriv Steine i ein e-post til HF.

At Team Steine får sin eigen stall, tyder at teamet kan trena opp hestar, melda dei på løp og køyra inn pengar. Steine skal forvalta andre sine hestar, så ansvaret er større enn før. Han vil hjelpa kundane med å finna hestar. Dei betalar ein sum i månaden for at han skal ta seg av hesten, fôra, trena han og elles gjera det som trengst for å laga ein løpshest.

Dei siste åra har Steine arbeidd for travkusk og -trenar Åsbjørn Tengsareid og fylgt unghestane heilt frå temjing til store klassiske løp.

Vil oppdra ti hestar

På Jarlsberg får Steine ti boksar til rådvelde. Det er fem stallar på banen. To av dei står tomme og vert brukte til oppstalling på løpsdagen. Fleire stallar i området rundt Jarlsberg sender hestar når det er løp.

Hestane er delte i andelslag. Nokre eigarar er to om ein hest, andre kan vera hundre. Dei deler utgiftene og opplevingane, og det er ein meir overkomeleg måte å verta hesteeigar på. Andelslaga skapar band mellom hesteeigarane og trenaren. Det er nokså dyrt å ha ein hest på trenarstall, seier Steine.

På Jarlsberg har Steine tilgang til rundbanen, rettbanen og eit inngjerda område for hestane. Rettbanen er ei rett strekning der det ikkje er helling. Han er såleis meir skånsam for beina til hesten.

Steine betalar ein viss sum i månaden i leige, og slepp å tenkja på at banane skal verta preparerte. Det er ei gunstig løysing, seier han.

Innbyr kvemmingar

Steine har leika med tanken på eit andelslag der folk frå Kvam kan interessera seg.

– Eg kan gje tilbod om ein andelshest frå Kvam som far min har oppdretta, eller eg kan kjøpa inn ein. Det hadde vore spanande å få til. Viss me oppretta hundre andelar, så ville det verta rimeleg å vera med på. Det kan me koma tilbake til, viss det er aktuelt, seier Steine.

Summen per andel kan variera frå nokre hundre kroner til fleire tusen, alt etter kor mange andelar det er på kvar hest.

Teamet vil satsa på ung- og løpshestar. Alle som har del i ein andelshest, vil kunna fylgja sin hest i ei lukka Facebook-gruppe.

Ser fram til auksjon

Steine er klar over at yrket er beinhardt, men han brenn for faget. Løpsbiten har gått over all forventing, seier han. Det gjeld også treningsdelen, som han har stor interesse for. Steine er trygg på fundamentet sitt, og fasilitetane på Jarlsberg gjer det enkelt for han som trenar.

Han gler seg til den såkalla klasseløpsauksjonen laurdag 9. september på Bjerke travbane. Svært mange spanande individ skal takast i augnesyn, med ei avstamming som Steine likar svært godt.

Hesteeigarar er velkomne til Team Steine, og kundar skal setjast i høgsetet, lovar han. Steine held på og pussar opp stallen og ser føre seg at han startar verksemda 1. september.