Idrettslag ynskjer å byggja tennisbanar

Det er ein bane der ein nyttar veggene, som i squash, men brukar eit nett, som i tennis. Som eit eventuelt steg to ynskjer ein å byggja ein utandørs standard tennisbane.

Det vart svaret då idrettslaget spurde seg sjølv kva det kan gjera for å få meir fysisk aktivitet knytt til den gamle ballbanen i Sætveithagen, ifylgje leiar Gudmund Toreid.

Han skildrar planane i eit notat til Ullensvang kommune. Toreid har bede om ein førehandskonferanse med kommunen snarast mogleg etter fellesferien.

Banen er i dag delvis overgrodd og har ikkje vore nytta på mange år. Arild Njåstad har i fleire år fått nytta staden til vedproduksjon. I samband med dette har han gjort «ein kjempeinnsats» for å rydda heile området slik at det no kan nyttast til friluftsføremål, ifylgje Toreid.

Han opplyser til kommunen at ein hall vil gje høve til å nytta padelbanen heile året. Det som har gjort padeltennis til ein av dei raskast veksande sportane i verda, er at han kan spelast av alle frå fyrste dag. Tradisjonell tennis krev at ein meistrar det tekniske før ein kan få særleg utbyte av sporten, opplyser Toreid.

Idrettslaget ser føre seg hallen reist i treverk, med innlagd straum med tanke på lysarmatur og eventuelle ventilasjonsvifter. Ein padeltennisbane vil måla 20,5 gonger 10,5 meter. Vanlegvis er det to spelarar på kvar side. Ein eventuell tennisbane vil måla 36,6 gonger 18,3 meter.

Finansieringa vil verta gjord med eigne pengar, dugnad, tilskot og gåver, «spelemidlar» og kommunale pengar til anlegg. For å kunna søkja om spelemidlar, må ein ha ein leigeavtale med grunneigaren – kommunen – på minst 30 år. Det er von om byggjestart i andre halvår av 2023, skriv Toreid.