– Hundane tek adrenalinet vårt som aggresjon
Emilie Nielsen og hunden Hedda var blant dei som fekk testa både lydnad og det å vera nervøs saman på Børve Gard denne helga.
Det er mykje pirk, men det er moro, synest 13-åringen frå Tørvikbygd. Ho er den yngste deltakaren denne helga, men det er ho van med.
– Eg synest det er litt kjedeleg. Eg skulle ynskja det var fleire unge som var med.
– Men det er litt kult å vera den einaste unge, då, seier mor hennar, Kristin Nielsen.
Sjå bilete frå konkurransen her:
Hundesport driv både mor og dotter med, og begge deltok då Kvam Hundeklubb arrangerte konkurranse i rallylydnad. Mor var fyrst ut og konkurrerte i klasse 1 laurdag. Det gjekk forholdsvis bra. I alle fall i starten.
Ved kvart skilt er det øvingar som skal gjerast, og ein har fem sjansar til å få det til, fortel ho. På det nest siste skiltet ville ikkje hunden verta liggjande då Kristin skulle gå litt vekk frå henne. Kjipt, synest Kristin, men alt i alt hadde ho god grunn til å vera nøgd.
– Uvanleg situasjon
Sundag var det Emilie sin tur til å prestera med hunden. Før start sa ho at ho ville vera nøgd så lenge ho ikkje vart diska. Det ho må øva mest på, er å vera nervøs saman med hunden, fortel mor Kristin.
– Merkar de godt på hundane at det er konkurranse?
– Ja, veldig, seier Kristin.
– Hundane tek adrenalinet vårt som aggresjon, seier ho.
Nokre hundar vert veldig stressa i ein konkurransesituasjon. Hundane forstår ikkje kva som skjer med eigaren. Det er ein uvanleg situasjon for dei. Det må trenast på, fortel Kristin.
Må nytta på
Sjølv om det heiter rally, har ikkje konkurransen noko med fart å gjera. Det handlar om å få hunden til å gjera ulike øvingar på kommando. Det kan vera «sit», «dekk», «bli», «på plass», «hopp» eller å «gå rundt». Plassering i forhold til føraren har òg mykje å seia.
Også hundeføraren vert vurdert. Det vert lagt merke til samspel, gode haldningar og eventuelle dobbeltkommandoar. Det fortel Ann Kristin Håland Træbakken.
Ho sit i styret til hundeklubben og hadde kontroll på deltakarlistene under konkurransen. Ho fortel at dei ti kvemmingane som var med i konkurransen, gjorde det godt. Totalt var det 33 deltakarar laurdag og 34 sundag.
Konkurransane laurdag og sundag var delte og talde kvar for seg. Klubben vil nytta på når ein fyrst har ein dommar på plass, seier Træbakken. Det er nemleg få dommarar på Vestlandet. Dommaren denne helga, Birgit Espeland, kom reisande frå Sola.
Klubben fekk fleire pallplasseringar, mellom anna ein 1.-plass til Hanne Meyer Tveit og hunden Frøya i klasse 1.
