Hevda seg i Stryn
Skiskyttarane Hanna Børve og Malin Auganæs Bergtun kjempa om topplasseringar i Markane i helga. Kvemmingane leverte på høgt nivå.
Markane Idrettslag skipa til både noregscuprenn og noregsmeisterskap i skiskyting i Ullsheim i helga. Best av kvemmingane var Børve, som enda på 2.-plass i noregscupen både fredag og laurdag.
Fleire pallplassar
På fellesstarten i klassen for 20–22 år gamle kvinner fredag fekk Børve ned 16 av 20 blinkar. Sjølv om det vart éin strafferunde per skyting, syrgde god fart i sporet for at berre Gro Njølstad Ranby frå Ivrig IL kom før Børve i mål. Øystesejenta var 1.26,6 bak vinnaren.
Bergtun vart nummer 9 i kvinner senior. I K17 vart Hedda Høen Mo nummer 20 og Andrea Sørheim Almeland nummer 23.
Laurdag deltok Bergtun og Børve i parstafetten i klassen K17–senior. Kvemmingane gjekk på 2.-laget til Hordaland SSK. Dei kom i mål 1.17,4 bak Hordaland SSK 1, som bestod av Andrine Øverland Hatling og Une Kvelvane.
Klubblag på parstafett
Dei to skiskyttarane representerer båe Kvam Langrenn- og Skiskyttarklubb. At dei to jentene frå Øystese og Norheimsund fekk gå stafett saman, tykte dei var moro.
– Det var veldig kjekt å gå saman med Hanna, spesielt sidan det var eit reint lag frå Kvam, skriv Bergtun i ei melding til HF.
Norheimsundjenta har gjennomført fleire gode løp i vinter, der ho mellom anna vann eit noregscuprenn på Stiklestad i januar. Ifylgje Bergtun har det vore ein intensiv sesong. Sjølv om ho kjenner på kroppen at ho har gått mange renn, ser ho fram til noregsmeisterskapen for seniorar i Alta i slutten av mars, opplyser ho.
– Forma er heilt grei. Eg byrjar å verta litt sliten, men eg gler meg til NM. Det brukar alltid å vera morosamt, skriv Bergtun.
Sundag stilte dei fire kvemmingane på startstreken på sprinten. Då kom Bergtun på 7.-plass, Børve på 10.-plass, Almeland på 11.-plass og Mo på 20.-plass.
