Heidra for enorm innsats

Utmerkingane, dei fyrste i slaget i den 73 år lange soga til laget, vart halden strengt løynd fram til ho vart kunngjord på årsfesten til idrettslaget på Jonsvoll sundag ettermiddag.

Bakgrunnen for heideren er at duoen har gjort ein ekstraordinær innsats for idrettslaget og jondalssamfunnet i ymse prosjekt dei siste ti–femten åra, opplyste nestleiar Ingrid Guntveit.

– Det er nesten for mykje, sa Jensen då han overraska tok imot prisen.

Etter å ha fått litt tid til å samla seg, sa han at mange har gjort mykje i idrettslaget. Sjølv har han engasjert seg mest i det han brenn for, påpeika han.

– At eg har fått mogelegheita til å få gang på ting, og at folk seier ja og er positive, er veldig kjekt. Det er utruleg mykje positivitet når ein skal få folk til dugnad og få tak i pengar. Om dette er fortent eller ikkje, anar eg ikkje, seier han.

Jensen seier til HF at han vil dela æra med styreleiaren i idrettslaget, Gudmund Toreid, som han meiner gjer ein stor innsats for å få fart i sakene. Toreid var i sørlege strok sundag, men fekk varme tankar, rosande omtale og stor applaus av dei frammøtte.

Drivande kraft

Selsvik, som ikkje kunne vera til stades sundag, har merkt seg ut særleg som leiar i tur og merkjegruppa. Han vert tilskriven hovudæra for at jondalsfjella har 38 merkte og skilta turløyper. Vel å merka har han hatt god assistanse av Steinar Smith og Åsmund Bakke.

– Men utan Sveinung som initiativtakar, eldsjel og pådrivar ville ein aldri ha vore der ein er i dag, heiter det i grunngjevinga.

Selsvik har står i tillegg bak ideen om og initiativet til turskiløypa frå Vassenden til Fodnastøl. Han har søkt, henta inn aksept frå grunneigarar og lagt ned eit utal arbeidstimar for å realisera prosjektet, som omfattar også to rastebuer, trakkemaskin og bygging av garasje.

Som om ikkje det var nok, har han vore drivkraft og organisator i dagsturhytteprosjektet på Teglhaug. Mellom anna fekk han skuleklassar på Jondal skule med på hyttedugnaden, noko som utløyste ei gåve på 60.000 kroner til idrettslaget. Desse skal gå til løpebanar og lengdegrop ved skulen.

– Ukueleg optimist

Like ved dei sistnemnde tiltaka ligg kunstgrasbanen, der Jensen har hatt eit par hender på rattet. Då anlegget vart opna 6. juni 2010, var det det dyraste prosjektet i soga til idrettslaget. Fleire medverka, men Jensen spela ei sentral rolle heile vegen.

I tillegg har han både arbeidd på dugnad med og skaffa pengar til diskgolfbanen i Djupevik, og vore uvurderleg i spinningsalprosjektet i den andre høgda i fleirbrukshallen.

– Han var den som såg moglegheitene. Med stå-på-vilje, engasjement og ukueleg optimisme har han som leiar i prosjektgruppa drive fram arbeidet på rekordtid. Både når det gjeld prosjektering, innkjøp og avtalar, kontakt med sponsorar og ikkje minst dugnad har han vore den drivande krafta, heiter det i grunngjevinga.