Hege feira bursdag med siger mot Trio
Sundag var det 2.-divisjonskamp i volleyball for Rossvoll-damene i Øystesehallen. Bortelaget Trio måtte reisa heim att utan poeng.
– I dag skal eg feira med å sjå herrelaga spela kampane sine og eta kake, fortel spelande trenar og lagkaptein Hege Buene.
Buene vart 29 år sundag. Ho var ein av få som spela alle ballvekslingane. Ho bidrog til at Rossvoll-damene vann 3–0, og var nøgd med laget sitt.
– Me spela bra mot eit godt lag. Me har småfeil innimellom, men me klarar å henta oss inn att, fortel ho.
Snudde settet
I 1. sett var det Trio som starta best. Då stillinga var 1–5 til bortelaget, tok hjelpetrenar Bård Hogne Kjosås timeout. Det gav effekt. Rossvoll henta seg inn att og vann settet 25–17. I både 2. og 3. sett vann heimelaget 25–23.
Alle dei ti spelarane i kamptroppen fekk spela. Buene fortel at det er viktig å rullera på laget og gje alle sjansen.
– Alle skal få prøva seg. Det er fleire som ikkje har spela i denne divisjonen før. Me lyt finna balansen i laget når me byter, seier Buene.
Alle skal få
Hjelpetrenar Bård Hogne Kjosås leia laget frå sidelina sundag. Han synest laget spela ein god kamp. Laget meistra mottak, opplegg og angrep godt, seier han. Han påpeikar at laget har ein god miks av spelarar. Nokre av spelarane er rutinerte, medan andre har lite erfaring frå nivået.
– Me må gje alle kamptrening. Det er viktig.
Han skryter av alle spelarane i kamptroppen. Han trekkjer særleg fram dei som spelar mest. Dei har evna til å skaffa laget poeng når det trengst, fortel han.
Rossvoll har 6 poeng etter 3 kampar. Kvinnene har vunne 2 kampar og tapt 1 kamp. Dei ligg på 2.-plass i 2. divisjon i regionen Hordaland. Trio har tapt 2 av 2 kampar, og ligg på 8.-plass av ni lag. BTSI toppar tabellen med 3 av 3 mogelege sigrar og 9 poeng.
