Hardingar hevdar seg i inne-LS
Kjetil Skår er kvalifisert til finalen i Landsskyttarstemnet innandørs, berre 1 poeng bak leiaren.
Tevlinga går av stabelen i Stjørdal denne helga. 29 i Hardanger Skyttarlag og 7 frå Jondal Skyttarlag har teke den relativt lange turen.
Hardanger-skyttar Skår er den einaste frå Hardanger som lukkast med å kvalifisera seg til finalen i klassane 3–5 og eldre junior sundag. Dei 20 beste får delta. På lista er han omringa av årlege skyttarkongekandidatar.
Skår har endåtil reelle vinnarsjansar, ettersom han med 248 ligg på 3.-plass i klasse 3–5 og eldre junior, berre 1 poeng bak den 17 år gamle jenta som er i føringa.
Heilt vanleg opplading
– Det var steikjande moro, seier Skår, som vedgår at han var nervøs og at beina rista då han fyrte av dei ti siste skota.
– Korleis har du ladd opp?
– Eg har trena heilt vanleg og skote nokre stemne. Så ikkje noko spesielt, seier Skår.
I finalen ventar ikkje den tradisjonelle «omgangen» med 10 skot i liggjande stilling, men eit såkalla grunnlag med 3 skot i ståande, 3 skot i kneståande og 4 skot i liggjande stilling. Skytetida er 2 minutt.
Harald Brekke, også han i Hardanger Skyttarlag, prikka inn 246 poeng, men det heldt ikkje til finale. Han vart nummer 22. Brekke seier resultatet var over all forventing, med tanke på treningsgrunnlaget hans.
Liv Sollesnes, Jondal, låg godt an etter 15 skot, men 96 på «grunnlaget» sende henne ned til 69.-plass. Like mange poeng, 244, fekk Dag Skår frå Hardanger, som enda på plassen over jondølingen etter 25 skot.
2 til i finale
Også Magne Lysen frå Hardanger er klar for finale. Han vart nummer 15 i V55 med 247 poeng. I same klasse var Henry Øye, Hardanger, den fyrste på lista som ikkje fekk finaleplass. I klasse 2 er Terje Mo Bjørklund, Hardanger, klar for finale med 244 poeng og 15.-plass.
Tuva Lerfall Alvsåker, Jondal, var med 246 poeng berre 2 plassar frå finaleplass i juniorklassen.
Kong Harald skulle vitja tevlinga i Trøndelag, men visitten er avlyst fordi kongen er sjukmeld. 2.456 var påmelde til arrangementet.
Me gjer merksam på at journalist Sander Eide Aase, som har gjort intervjuet i artikkelen, sjølv deltek i tevlinga som representant for Hardanger Skyttarlag. Red.
