Hardhausar og hyggje på Sjusete: – Framleis plass til fleire
Ein gamal kjenning vannTorefjellsrennet laurdag.
Deltakarane i klassen «Hardhausen klassisk», som opna Torefjellsrennet, stilte til start klokka 9.45 laurdag morgon. Det var eit kvarter etter planen. Seinkinga kom av at løypa var dekt med ti centimeter nysnø då rennleiar Jan Tore Uglehus Tveit vakna laurdag morgon.
– Me hadde trakka ferdig til klokka 01 om natta og hadde perfekte forhold. Så vakna me klokka 06 og såg at det hadde kome ti centimeter til. Då var det berre å hiva seg ut, seier Tveit.
Sjå fleire bilete og video frå rennet nedst i saka.
Etter innfallsmetoden
– Eg er sliten no, seier Gustav Aarre Mohus.
Kroppsspråket tilseier at han snakkar sant, der han ligg flat og forma som ein kross nokre meter frå målstreken. Saman med kompisen Odin Strømberg var han mellom dei som sleit seg gjennom fire mil i klassisk stil og kvalifiserte seg for nemninga hardhaus.
Mohus fortel at han trenar, men aldri har gått skirenn før.
– Og då byrjar du like godt med eit på fire mil?
– Ja, ein må jo klinka til når ein fyrst skal gjera noko.
Karane, som held til i Bergen, melde seg på med innfallsmetoden etter at Strømberg nytta Google til å finna ut kva som skjedde i nærleiken av Kvamskogen. Om dei er slitne, skryter dei av rennet og løypene, og forsikrar om at dei har hatt det veldig kjekt undervegs.
Feilrekna sluttspurten
Strømberg, som gjekk for Equinor, fortel at den «klubblause» Mohus gjekk fyrst av dei to nær sagt heile vegen, men at han la inn ein sluttspurt og passerte han då dei nærma seg målgang. Ein målgang Strømberg feilrekna litt. Då han kom til brua, der han trudde målstreken var, oppdaga han at det var endå ein kilometer att. Det vart tusen seige meter, men i mål kom han, og best vart han altså.
– Fire mil, og så slår han meg med sekund! pesar Mohus der han ligg.
Litt meir enn sekund vart det vel å merka. Sjølv vedgår Strømberg at han utnytta kameraten litt ved å lata han laga spor i nysnøen. Vêret var nemleg mildt sagt skiftande. I starten, då dei gjekk opp til Brotteli og naut utsikta, skein sola. Sidan tjukna det til og byrja snøa att, før det letta igjen til målgangen.
Karane gjekk på ski med fellar og slapp såleis å tenkja på smurning, noko som viste seg ikkje å vera så dumt.
– Me visste ikkje at det var så bratt. Då var det godt med god heng. Men me mista jo litt på gliden, seier Strømberg.
Frå renn til renn
Rennleiar Tveit er alt i alt nøgd med dagen og rennet. Forholda var gode, meiner han, med trygge nedkøyringar og godt feste oppover. Då HF snakka med Tveit laurdag kveld, hadde han berre fått gode tilbakemeldingar.
Ein av dei nøgde deltakarane var John Olav Måge frå Strandebarm Idrettslag. Han syntest løypene var fine, sjølv om det var nokre seige «fiskebeinsbakkar», som han kalla det. Kvemmingen, som tysdag denne veka deltok i Vinterkarusellen, gjekk til topps i eigen klasse (60–64 år) med tida 3.03.22.
Og som om ikkje det var nok: Neste laurdag er det renn igjen. Då er det sjølvaste Birkebeinerrennet som står på programmet. Løp tysdag, fire mil laurdag og over fem mil komande laurdag er ikkje ideelt, vedgår han.
– Eg synest det er litt for nært. Det burde ha vore 14 dagar mellom. Eg har ikkje trening til slike utskeiingar kvar helg, og tok det litt roleg på andre runde i dag, seier sprekingen.
Den rolege andrerunden var ikkje rolegare enn at han med alle klassane samla enda på ein 4.-plass.
Saknar ungdomane
Trass ein fin dag og mange gode ord er rennleiar Tveit lei for at det ikkje var fleire som stilte til start. I tida før pandemien kunne ein oppleva å ha mellom 150 og 200 deltakarar på startstreken. I år stilte rett over 70 personar deltakarar, fortel han. Sjølv om talet kunne ha vore høgare, er det ein auke frå fjoråret.
– Me er på riktig veg, men me har plass til minst dobbelt så mange.
Også Måge nemner lågt deltakartal. Samstundes saknar han ungdomane. Tveit vonar å sjå fleire deltakarar til neste år, spesielt frå eigen klubb. Det er i alle fall målet og noko som skal jobbast med, fortel han.
Sjå starten på «Torefjellsrennet fristil» her (video: Elisabet Aarekol):
Elles påpeikar rennleiaren at han er svært nøgd med dugnadsinnsatsen med rennet. Det er viktig at folk stiller opp, seier han. Frivillig hjelp er naudsynt for at rennet skal kunna gjennomførast og verta vellukka.
– Korleis er det å få tak i folk?
– Eg vil seia at generelt sett er folk flinke til å stilla opp. Og det er så viktig! Dette er ikkje noko ein får til aleine.
Fana IL på topp
Mannen som kom fortast i mål i Hardhausen, var Matias Oppedal frå Fana IL i klassen for menn mellom 30 og 34 år. Han gjekk på tida 2.45.37. Berre to av deltakarane i Hardhausen var kvinner. Siri Titland Martinsen frå Fana IL, einaste kvinne i klassen for kvinner mellom 45 og 49 år, gjekk på 3.24.11. Torild Kveberg frå Kvam LSK i klassen 60–64 år fekk tida 4.11.25.
Beste tid i det 5 kilometer lange fristilrennet gjekk til Kristin Brattabø frå Osterøy IL, som gjekk i klassen for jenter mellom 11 og 12 år og var einaste som gjekk den kortaste distansen. Av deltakarane som gjekk 11 kilometer gjekk Marius Vognstølen Aarnes frå Fana IL i klassen for menn mellom 16 og 17 år snøggast. Han passerte målstreken etter 21.13.
Rennet på 22 kilometer hadde flest deltakarar. Raskast av alle var Thomas Vethe frå Vargar IL, som fekk tida 1.17.52. Han gjekk i klassen for 20–24 år gamle menn.
Sjå alle resultata her.
