Hard start på hausten
Øystese/Norheimsund heldt nullen i nær ein time. Så rakna alt. Lagleiaren er nøgd likevel.
Starten på haustsesongen vart tøff for heimelaget med fleire svært unge spelarar, framføre eit minst like ungt publikum på Øystese stadion fredag kveld. 0–6 enda kampen med, etter at heimelaget sleppte inn 6 mål på om lag 23 minutt etter pause.
Gjestene – som er serieleiarar – førte kampen også i det meste av 1. omgang, men utan å skapa dei heilt store og mange målsjansane. Nokre var det rett nok, men heimelaget hadde enno krefter til å blokkera og få ballen bort, pluss at målvakt Vinjar Voster spela ein solid kamp.
Verre vart det altså etter 57 minutt, då gjestene fekk det fyrste målet på eit straffespark. Sidan gjekk det berre éin veg i vel 20 minutt.
Fekk skrapa saman
Svein Stensland leia laget, sidan hovudtrenar Denis Ljubović var utanlands. Han fortel at det var ein kamp for å skrapa saman nok spelarar til kampen. Nokre kunne ikkje spela kampen, medan andre som var med i vårsesongen, har forlate Kvam.
Til dømes mangla sentrale spelarar og målskårarar som Samuel Skåre og Anders Botnen. Til gjengjeld stilte veteranar som Lars Eirik Berge, Johannes Røyrvik og Leif Tore Gjerde opp som reservar.
Troppen må delvis byggjast opp att på nytt.
– Eg trur me var ti spelarar på trening onsdag, seier Stensland.
Eivind Madsen Skeie og Rune Øvsthus Kolltveit, som sjølv spela kampen, gjorde ein god jobb for å samla nok spelarar til å stilla til kamp. Og dei som var med, gjorde ein kanonjobb med å temja bortelaget.
– Me var einige om å spela i 4–5–1-formasjon og liggja kompakt. Nest-Sotra var frustrert etter 1. omgang. Så var me litt uheldige og fekk straffemålet imot, seier Stensland.
Det har ikkje lukkast HF å koma i kontakt med hovudtrenar Denis Ljubović.
Ikkje nedfor
Då den fyrste skåringa fyrst kom, og det samstundes byrja minka på kreftene, formeleg rann ballane inn. Trass seksmålstapet var stemninga god etter kampen, fortel Stensland.
– Me visste at me måtte «på jobb», og det var me til gagns, seier han.
Øystese/Norheimsund har 17 poeng og ligg trygt plassert på 5.-plass på tabellen. Nest-Sotra leier med 26 poeng. Kvemmingane møter Sædalen i Bergen komande laurdag.
