Har skrudd på lysa på Sjusete

Dei mest ivrige brukte ikkje lang tid på å koma seg ut i sporet. Magnus Drægni Mæland frå Øystese og Håkon Eide frå Tørvikbygd var relativt tidleg ute. Onsdag ettermiddag spende dei på seg skia og tok nokre rundar i lysløypa.

– Då me høyrde at løypene var klare, var det om å gjera å få på seg skia og prøva snøen før den forsvinn, seier Mæland.

Både for han og Eide var det første skituren denne vinteren. Likevel tykte Mæland det gjekk forbausande lett.

– Det første eg merka, var at det var så utruleg lett å gå den første turen i år, seier Mæland.

Eide er ikkje samd.

– Eg kjenner at eg har vorte rusten i løpet av sommaren. Eg må nok jobba med balansen, seier han.

– Brukbart, men ikkje bra

Asgaut Valland køyrer løypemaskina til skisenteret. Han fortel at løypene førebels ikkje er på sitt beste.

– Du treng kanskje ikkje ta på deg dei beste skia. Snøen er veldig tørr og laus, og ikkje veldig djup. Løypene er ikkje bra, men det går an å gå på ski, sa han på tysdag.

Det trengst meir snø for å verta skikkeleg fint.

– Får me 20 centimeter til, gjerne litt våtare snø, vert dette veldig bra, seier Valland.

Han trur dei som tek på seg fjellskia og går utanfor løypene, kan få ein fin tur.

– Om du til dømes går rundt Kjosås, trur eg det går heilt fint. Det er vel om lag 20 centimeter med snø, seier han.

– Det vert lys

Styreleiar i Sjusete skisenter, Lars-Hogne Berge, fortel at sidan lysløypa kan brukast, er lysa skrudde på.

– Vanlegvis plar me slå på lysa i lysløypa tidlegare enn i år, slik at dei som ønskjer det, kan gå turen på barmark. Straumprisane har gjort at me i år har valt å venta på snøen. Om snøen forsvinn, vil me vurdera å skru lysa av til snøen kjem attende, seier han.

Det er 195 lys på Sjusete. 79 er gamle lys med glødepærer. Håpet er at i alle fall nokre av desse snart vert bytte ut med ledlys.

– Ledlys brukar om lag ein femtedel så mykje straum som dei gamle glødepærene. Sjølv om det er ei stor eingongsinvestering, vil det løna seg i lengda. Me har fått 300.000 kroner til føremålet frå Sparebankstiftinga Hasrdanger, og er i kontakt med lokale elektroinstallatørar, seier Berge.

Fekk nytt tak

Før årets sesong har skihytta fått nytt tak til 400.000 kroner.

– Me gjorde så mykje av arbeidet me kunne på dugnad, og så har Hardanger Byggsenter gjort resten. Det gamle taket var 25 år gamalt og moge for å verta skifta, seier Berge.

Han fortel elles at det er rydda skog langs lysløypa.

– Det håpar me skal føra til at det kjem meir lys og færre greiner inn i løypa.

Løypene er dei same som i fjor.

– Me hadde ambisjonar om å utvikla løypene, men dei høge straumprisane har gjort at me ikkje har hatt pengar til det, seier Berge.

Straumprisane har ikkje ført til høgare løypeavgift.

Meteorologane spår mildare vêr og meir snø fredag og laurdag, før plussgradene tek styringa og regnet skal koma.