Håpar å fylla nytt anlegg med aktivitet

Om lag 8,5 millionar kroner, medrekna dugnadstimar som kasserar Tormod Lunestad ikkje har våga å telja, er lagde ned i den delen av skytebaneanlegget som tilhøyrer ØJF.

Resultatet er kort og godt eit topp moderne anlegg med leirduebane, skeetbane, sekretariatshus med selskaps- og møtelokale og riflebane. Den blå fargen på husveggen viser vegen til ØFJ-fasilitetane, som har naboar i anlegga til Kvam Pistolklubb og Hardanger skyttarlag.

Det meste med smell i er med andre ord samlokalisert. Til gjengjeld er dei gamle banane i Tolomarka og på Melstveit lagde ned.

Laurdag fekk ein liten gjeng testa anlegget. ØFJ skipa til aktivitetsdag, både for å visa det fram og for å feira 75-årsjubileet sitt. Små og store fekk prøva seg både med rifla og hagla, testa kunnskapane gjennom ein liten natursti og sjekka presisjonen med fiskestonga.

Tore Haukås frå Øystese, son av ei mangeårig eldsjel i ØJF, var ein av dei som tok med seg borna til Vangdalsåsen.

— Eg trefte skiva. Det beste skotet mitt var 8,7, fortel Julian Haukås etter å ha prøvd seg med rifle med kaliber .22.

Også systera Mari prøvde seg, men ho hevdar å ha hatt større problem med å finna vegen til blinken, som stod 100 meter frå standplassen.

Etterpå gjekk dei til «fiskebanen», der Sjur Tarjei Fykse og Alf Olav Melstveit hadde markert ringar som fiskarane skulle freista treffa med sluken. Det viste seg å vera vanskelegare enn ein kunne tru, men Hans Rykkje imponerte då HF var til stades. Han slo til med ein «innerblink» på det fjernaste målet.

Leiar i ØJF er Cato Landsvik, som kom til Kvam på grunn av kjærleiken. Han tok på seg vervet i laget, og har vorte dugeleg imponert over den sterke dugnadsviljen både i laget og elles i Kvam. Det er ein viktig del av årsaka til at han har slege seg ned, sjølv om han har arbeid i Bergen.

— Det skjer jo så mykje her! Alle driv jo på med noko. Det synest eg er veldig positivt, seier han.

Han konstaterer at laget no har eit tipp topp anlegg. Skeetbanen, til dømes, skal stetta ikkje berre krava som vert stilte til NM-arrangørar, men også krava til OL-arrangørar. Det fyrste målet er likevel ikkje å føra den olympiske elden opp Heradstveitvegen, men å få fleire til å forstå kor ypparleg tilhøva ligg til rette for skyting med både det eine og andre våpenet og kaliberet. Vona er å auka medlemstalet, som i dag er kring 280.

Ein fin måte å gjera det på, er å invitera til gratis skyting og premiera innsatsen. Normalt kostar det nemleg litt å fyra av.

Det kjem meir

Landsvik fortel at arrangementet kolliderte med Øystese Eat Move Sleep Cup, noko ØJF ikkje var klar over då det var planlagt. Det kan ha bidrege til at ikkje så mange fann vegen til Vangdalsåsen.

Tidlegare i sommar skipa ØJF til fiskedag i Steinstøberget, med god oppslutning. Og fleire sjansar til deltaking kjem. Laget vonar å få til ein ny fiskedag i slutten av september, og planlegg dessutan ein jubileumsfest i november.

Vidare kjem lokallaget i LARS — Landsforeningen for Ryggmargsskadde — truleg på nytt besøk til ØJF i september. I fjor var gjestene i Fitjadalen for å fiska. I år er planen å lata dei skyta i Vangdalsåsen, der bygga er reiste i tråd med krava som vert stilte til universell utforming. Også andre funksjonshemma vil få invitasjon til å delta.

— Det er viktig for oss at alle kan koma seg ut, seier leiaren.

Fleire med no

Anlegget i Vangdalsåsen var ferdig om lag nett då statsministeren innførte «dei strengaste tiltaka i fredstid» i mars i fjor. Landsvik seier at aktiviteten er stigande no når pandemien ser ut til å gå mot slutten. Spesielt gler laget seg over at fleire damer kjem for å skyta med hagle på eigne kvinnekveldar.

— Ein må ikkje jakta for å skyta. Dette er rein sport òg, presiserer Landsvik.

ØJF har fleire medlemer som er tilsette på vidaregåande skular. Før sommaren tok alle elevane på VG2 turen til Vangdalsåsen, der dei fekk prøva seg på skyting. Ungdomane kosa seg – og jentene viste seg å vel så treffsikre som gutane. ØJF vonar å kunna gjera vitjinga til ein tradisjon. Landsvik vedgår at både kommunikasjonsform og transport er utfordringar laget må ta tak i.

— Er du under 18 og ikkje har eige transportmiddel, er ikkje Vangdalsåsen så lett å berre stikka innom. Me må verta betre til å både kommunisera og organisera transport. Me vurderer eigne ungdomskveldar med både skyting, sosialt samvær og mat, og ser trongen for ein eigen ungdomsleiar, seier han.

Kvam herad har bidrege sterkt til infrastrukturen i Vangdalsåsen. Landsvik rosar heradet for å vera positiv og stilla opp både økonomisk og på andre måtar.

— Me kan ikkje klaga på skatten no, seier han.

Det neste heradet kan hjelpa til med, er å ekspedera søknaden om bygging av eit nytt grindbygg på Blekeld i Fitjadalen kjapt. Tømmeret er hogt, og søknaden vert send inn om kort tid, fortel Landsvik. Vona er å reisa bygget i 2022.