Hanna Børve vart noregsmeister etter tøff start på vinteren

Då vart ho juniornoregsmeister på Lillehammer.

– Det er utruleg stort, spesielt med den inngangen til sesongen og dei utfordringane eg har hatt i kjølvatnet av koronaen. Det har teke tid å få kroppen i konkurransemodus igjen. Eg har vore nøydd til å vera påpasseleg, slik at eg ikkje fekk tilbakeslag, seier kvemmingen etter at gullet er sikra.

Mest på standplass

Ho la grunnlaget for NM-triumfen på standplass. Sjølv om ho gjekk fort på ski, var det kanskje skytinga det var mest kvalitet på denne gangen. Tre av seriane var feilfrie. Så kom det to bomskot og tilleggsminutt i den andre serien på liggjande.

– Det var arbeidsuhell, ettersom eg i utgangspunktet hadde god kontroll. Det var ein liten trekk som eg ikkje heilt tok høgd for. Men eg trefte på 18 av 20 skot og er nøgd med det, seier skiskyttaren, som sist vart noregsmeister i 19-årsklassen for tre år sidan.

Når me spør Børve kva ho rangerer høgast av dei to gulla, tenkjer ho seg litt om før ho konkluderer med det siste. Det er vanskelegare å gå til topps i klassen for 20–22 år enn i 19-årsklassen.

– Det er tre årsklassar i éin og same klasse i 20–22 år. Dermed vert det fleire konkurrentar og tøffare konkurranse. Fleire av dei som konkurrerer i klassen, har fått prøva seg i IBU-cupen og gjort det bra der. Difor så er det ekstra kjekt å vinna NM-gull i den klassen, spesielt når dette er mitt siste junior-NM. Neste sesong er eg senior, seier kvemmingen, som er inne i sin sjette og siste sesong på juniornivå.

Tek steg opp

Planen er å halda fram satsinga når ho om halvannan månad tek farvel med juniorklassen. Det skjer etter alle solemerke i Alta, for i år er det Alta og Finnmark som er vertskap for noregscupfinalen og senior-NM.

Den nybaka noregsmeisteren vil i senior-NM få sjansen til å bryna seg på Marte Olsbu Røiseland og jenter som har gjort det bra i verdsmeisterskapen i Oberhof. Det er både god læring og inspirasjon for utøvaren, som er del av det beste privatfinansierte laget i Norge.

Knut Tore Berland, som har hovudansvaret for Team Fosen Yard, har fått fram både verdscup- og ikkje minst OL- og VM-vinnarar. Det vanka både klapp på skuldra og ros til Børve, som også representerer Kvam Langrenn- og Skiskyttarklubb, fredag.

Veldig spesiell sesong

– Det har vore ein spesiell sesong for meg. Eg fekk trena bra gjennom sommaren og hausten. Det meste i treningsarbeidet gjekk på skjener, og eg såg veldig fram til dei internasjonale opningsrenna på Lillehammer. Så testa eg positivt og måtte stå over. Treningsplanen måtte endrast, og prestasjonane og resultata har svinga. Men det har vore nokre lyspunkt, mellom anna då eg vart nummer to i noregscuprennet på Stiklestad. Det var ein opptur og viktig for motivasjonen at eg fekk det til så bra som eg gjorde der, seier Børve til HF.

Ho er på Lillehammer den tredje vinteren på rad, og stortrivst i OL-byen. Børve er sambuar med Karoline Erdal frå Førde, som er på rekruttlandslaget i skiskyting. Dei trivst i lag.

Junior-NM skulle i utgangspunktet arrangerast i Tromsø. For ei veke sidan regna og bles det meste av snøen i NM-anlegget vekk. Ein kombinasjon av det og dårlege vêrprognosar førte til at forbundet bestemte seg for å flytta arrangementet sørover.

Hanna Børve protesterte ikkje på det, ettersom avgjerda spara henne for to reisedøger. Laurdag ettermiddag deltok ho i sprinten, der ho enda på 8.-plass. Tre bomskot førte til at ho ikkje var med i kampen om dei beste plasseringane.

I stafetten sundag gjekk Børve fyrste etappe for Hordaland SSK 1, som tok sylv. Laget var lenge med i gullkampen, men vart slege på målstreken av Nord-Østerdal 1.

Også kvemmingane Andrea Sørheim Almeland og Hedda Høen Mo deltok i meisterskapen. Fredag vart Almeland nummer 13 og Mo nummer 15. I normalrennet laurdag kom Almeland på 17.-plass og Mo på 22.-plass.