Gutar vann serien
Etter nok ein sterk siger enda Øystese/Norheimsund sitt G16-lag øvst på tabellen etter haustsesongen.
Osterøy/Fotlandsvåg var det siste laget som målte krefter mot samarbeidslaget denne sesongen. Kampen på Øystese stadion sundag enda 7–3 til heimelaget.
Med tre strake sigrar bak seg – den siste ein 8–1-siger mot Bergen Nord – var sjølvtilliten truleg på topp før sundagens kamp. Likevel var det ein kamp med litt «bylgjer», ifylgje kontaktperson Oddbjørn Vestbøstad.
– Fyrst hadde Øystese/Norheimsund initiativet, men så i andre omgang fekk bortelaget eit par billege mål. Då vart det litt nervar i kampen igjen, seier Vestbøstad.
Målrikt
Det fyrste målet kom etter berre 5 minutt, då toppskårar Sigurd Stevnebø Kaale skåra sitt fyrste for dagen. Etter 17 minutt skåra Markus Straumstein, og sidan rann det inn 3 mål til før pause – 2 til Øystese/Norheimsund og 1 til Osterøy/Fotlandsvåg. Måla til heimelaget stod Kaale og Lars Lundblad Vestbøstad for. Stillinga til pause var 4–1 til heimelaget.
2 minutt inn i andre omgang fekk heimelaget straffe. Målvakt Aragon Birkeland fekk oppdraget og stod for mål nummer 5 for Øystese/Norheimsund. Minuttet etter sette Anton Hjartnes inn nok eit mål for heimelaget.
Osterøy/Fotlandsvåg kvikna etter kvart meir til, og skåra 2 mål 10 og 11 minutt inn i andre omgang. Det gav liv i kampen og litt høg temperatur, fortel Vestbøstad. Temperaturen førte til nokre gule kort, men ikkje fleire mål for bortelaget.
Eirik Neteland Rykkje skåra kampens siste mål etter 83 minutt.
Stabilt lag
Kampen var den siste i år, og plasserte Øystese/Norheimsund øvst på tabellen med 19 poeng. Fleire lag har fleire kampar att, men korkje Flaktveit 2 på 2.-plass eller andre kan nå att Øystese/Norheimsund.
Vestbøstad seier at spelargruppa har vore stabil i haust, med god hjelp av spelarar frå Framnes. Det har gjort at ein ikkje har måtta styra med å få tak i nok spelarar før kvar kamp, og har vore glimrande, fortel han.
Det har blitt ei fin gruppe spelarar som har vorte meir og meir kjende utover sesongen. No vonar han flest mogleg av spelarane vil halda fram og vera med opp i neste årsklasse, som er G19.
