Gutar er klare for A-sluttspelet
G17-laget Øystese/Norheimsund er klar for eit møte med tyskarar i A-sluttspelet i Norway Cup.
Det vart klart tysdag kveld, etter at laget tapa 1–3 for Muslim Hands FC i den 3. og siste kampen i gruppespelet. Laget tok faktisk leiinga då det skåra på den fyrste sjansen sin, før motstandaren etter kvart slo hardt tilbake.
Motstandaren frå Islamabad i Pakistan slo alle laga i gruppa si og enda med 9 poeng, men kom resultatmessig dårlegast frå det mot nettopp kvemmingane. Dimed vart sistnemnde best av 3 lag med 3 poeng i gruppa og avanserte til A-sluttspelet. Med andre ord eit solid comeback etter at laget opna turneringa med 0–3-tap mot Vardeneset sundag.
– Ein opptur
Frank Kjøsnes frå Kvam, som såg kampen saman med fleire hundre andre, opplyser at Vinjar Voster vart lånt frå G16-laget og stod i mål, noko som var ei viktig årsak til at det vart med berre 3 baklengsmål.
– Dette var ein opptur. Gutane var veldig nøgde etterpå. Dei frykta denne kampen litt på førehand, for det andre laget var i finalen i fjor, seier Roar Rykkje.
Som forelder til ein av gutane har han teke på seg rolla som lagleiar, sidan trenar Denis Ljubovic vart hindra i å koma. Gutane får sjølve vera med og påverka taktikken i stor grad, forsikrar Rykkje.
I A-sluttspelet ventar fyrst tyske TUS Felde 1 på motsett banehalvdel torsdag føremiddag. Rykkje seier at spelarane gler seg til oppgjeret torsdag. Før den tid skal dei ha ein fridag og køyra gokart. Elles har dei mellom anna vore ein tur i forlystingsparken Tusenfryd.
Slutta med stil
For G16-laget Norheimsund/Øystese var utviklinga motsett. Allereie etter 2 kampar og 2 tap var det klart at gjengen ikkje ville koma til A-sluttspelet. Tysdag fekk gutane ein liten revansj då dei slo Ål IF 4–0, noko som førte dei forbi hallingdølane og opp til 3.-plass av dei 4 laga i gruppa.
– Ein veldig god kamp der gutane hadde god kontroll heile vegen, seier forelder Frank Kjøsnes.
Han opplyser at målvakt Ismael Ishimwe like godt stod bak det eine av måla då han drog til frå eigen halvdel. Dei andre skåringane stod Hallgeir Eide Mo, Vinjar Voster og innlånte Lars Lundblad Vestbøstad for.
