Gullgutar debuterte
Dei færraste stilte i dongeribukse då Hardanger Bordtennisklubb inviterte til Norheimsund Open laurdag, men i klassen «Golden Boys» fanst fleire.
HF fann tre av gullgutane på tribunen. Det nærma seg deira tur til å måla krefter, og ein flett ny racket vart pakka ut frå ein sekk.
To av dei – brørne Frank og Dag-Ivar Tangen – byrja på bordtennis for fire–fem veker sidan. Olav Ludvig Håbrekke har prøvd sporten éin gong før.
– På eit litt anna nivå
I idrettshallen var det 18 båsar med kvar sitt bordtennisbord. Frå tribunen kunne karane, som skulle konkurrera for fyrste gong, fylgja med på både yngre og meir erfarne spelarar.
– Legg de strategiar no?
– Eg prøver å henta litt, men det er berre med på å øydeleggja sjølvtilliten, seier Frank.
– Det vert på eit litt anna nivå, for å seia det mildt, seier Dag-Ivar.
Trioen ser ut til å ha det kjekt saman. I klassen «Golden Boys» er alle deltakarane frå den lokale klubben. Til saman er dei seks personar. Om alle kjem, då, påpeika Frank.
– Det er slett ikkje sikkert i vår aldersgruppe. Me har vareoppteljing etter kvart og håpar nesten at det er færrast mogleg som kjem, me då. Om det vert oss tre, får me fyrste-, andre- og tredjeplass, seier han.
– Steikjande moro
Då brørne Tangen var ein tur sørover i november, hadde ikkje Dag-Ivar spela bordtennis sidan han var 18 år. Der dei ferierte, stod det eit bordtennisbord tilgjengeleg. Karane testa det litt for moro skuld. Det viste seg å vera god avveksling, steikjande moro og god trim, fortel Frank.
– Så er det veldig sosialt, seier Dag-Ivar.
Spelinga ville dei halda fram med, så dei melde seg inn og vart med i den lokale klubben. Kvar torsdag er det trening i det nye lokalet i gymsalen i Steinsdalen.
Grunnen til at karane var med på laurdag, var at dei på treninga torsdag såg at nivået var nokolunde likt. Då kunne dei melda seg på.
Nær hundre deltakarar frå ti klubbar var med på turneringa. Hardanger stilte sjølve med 32. Det er ny rekord, fortel Håvard Markhus, sportsleg leiar i klubben. I fjor var det berre 14 som stilte frå den lokale klubben.
– Ein kjempestor oppgang. Me har vore over tjue deltakarar før, men aldri over tretti. Dette er det meste me har hatt, seier Markhus.
Sjå ein filmsnutt frå turneringa her:
Ein klubb i vekst
Den lokale bordtennisklubben er 36 år, og vart starta av Markhus, saman med Amund Leiren, Sølve Skutlaberg og Vidar Sangolt. Å skipa til Norheimsund Open har vorte tradisjon. Kor mange gongar det har vore arrangert, er ikkje Markhus sikker på, men truleg minst tjue. Kanskje tretti, til og med.
Det nye lokalet i Steinsdalen har gjeve klubben god vekst den siste tida. Lokalet har betydd veldig mykje for klubben, fortel Markhus.
– Me har fått ein stor auke i aktivitet. Folk kan trena på dagtid, og me har fleire treningsgrupper. Så er det kjekt at me normalt slepp å ta ned borda kvar gong. Hallen står rigga og klar, seier han.
I turneringa laurdag var det Njål Skulstad som enda opp med 1.-plassen i klassen «Golden Boys». Kestutis Barauskas vann finalen i klasse herrar B.
Sjå fleire bilete frå turneringa her:
