Greip sjansen med båe hender

Aktiviteten var stor då HF var innom idrettshallen i skuletida onsdag 5. oktober. Sjuandeklassingar som spelar handball til dagleg, instruerte dei yngre elevane i 3. klasse.

Kast ballen er namnet på undervisingsopplegget som Norheimsund skule har teke i bruk. Det har strekt seg over tre veker i haust. Kvar skuledag har borna i 2. og 3. klasse fått ulike ballutfordringar i friminutta. Til dømes har dei kasta og stussa ballen på ei rekkje ulike måtar. Målet er å gjera borna kjende med balleik og handball.

Det grunnleggjande

Kontaktlærar Hilde Børven, tidlegare handballspelar og -entusiast, har vore sentral i opplegget. Ho konstaterer at ein del born vantar grunnleggjande dugleik og motorikk med ball.

– For meg er det naturleg at ein kan kasta og ta imot ein ball, men ikkje alle kan det, seier ho.

Uteområdet ved skulen har ein fotballbane og nokre leikeapparat, men elles er det dårleg med aktivitetstilbod. Børven har observert at ein del av dei som normalt ikkje er særleg aktive i friminutta, har tykt at det har vore trygt og godt å vita kva dei skulle ta seg til gjennom Kast ballen.

– Det er veldig positivt at dei vert kjende med ballspel og det å kasta. Av og til er det litt vanskeleg å vita kva ein skal ta seg til her, særleg i dårleg vêr, seier ho.

3.-klassingane fekk eit eige opplegg i eit par timar onsdag. Fyrst hadde dei såkalla stjerneorientering med 12 ulike stasjonar som baud på ulike øvingar og utfordringar, ein del av dei baserte på det elevane har prøvd seg på i friminutta. Sidan spela dei handball med små fotballmål som mål.

Kast ballen kosta ikkje skulen noko. Opplegget var nemleg sponsa av sponsorane til handballforbundet. Skulane får dessutan behalda utstyret dei har fått, ikkje minst ei røys med handballar. Børven har observert at fleire elevar har teke med seg ein ball ut i friminutta sjølv etter at dei tre organiserte vekene var omme.

Nede for teljing

Kvam har altså eit handballag for gutar som er med i den såkalla A-serien, men elles er det dårleg med aktivitet innan sportsgreina. Om lag slik har det vore sidan Børven trekte seg ut or klubben for sju–åtte år sidan, etter om lag tjue år som eldsjel, trenar, leiar og spelar. På det mest aktive hadde Kvam Handballklubb ei rekkje lag på ulike nivå og alderstrinn.

Ho synest det er synd at klubben med små unntak ligg meir eller mindre brakk, og vonar nokon vil ta initiativ til ny aktivitet. Nokre av dei tidlegare aktive har spela saman litt for moro, mellom anna med framneselevar, men koronaen sette ein stoppar for det som var av tilløp.

– Håpet mitt er at dei eg trena og som no er vaksne, får lyst til å setja i gang att når dei kjem tilbake hit. Ein treng ikkje kunna alt for å byrja, seier ho.

Børven ber med seg mange gode minne frå tida då ein damegjeng spela saman i serien.

– Me hadde det så kjekt i lag. Eg tenkjer tilbake på det som ei veldig fin tid, seier ho.