– Godt spel, middels plassering
Det unge Rossvoll-laget som i helga deltok i U19-NM i Ålesund, enda eit stykke frå toppen.
Trenar Jon Erlend Haukås fortel at laget kom på 18.-plass. 24 lag deltok i noregsmeisterskapen.
– Men med tanke på at laget består av gutar som er 16 og 17 år gamle, er eg svært nøgd med innsatsen. Lagspelet var veldig solid, fortel han.
Kvemmingane spela seks kampar. Det enda med tre sigrar og tre tap.
Allereie i første kampen i gruppespelet møtte Rossvoll Torvastad IL Volleyball, laget som til slutt vann turneringa.
– Me tapte kampen, men i det første settet spela me fantastisk. Gutane viste kva som bur i dette laget, seier Haukås.
Årsaka til at Rossvoll sende dei unge spelarane til U19-NM, er at spelarane skulle få kjenna på U19-nivået og bryna seg på god motstand før U17-NM i Haugesund i april.
– Det eg såg i Ålesund, gjer at eg trur at helga i Haugesund kjem til å verta ufatteleg spanande, seier Haukås.
