– Godt å få noko att
Både jente- og gutelaget til Rossvoll Volleyballklubb kvalifiserte seg til NM då klubben skipa til regionmeisterskap for spelarar under 17 år i helga.
Rossvoll J17 gjekk av banen utan tap heile laurdagen, og vann også den fyrste kampen sundag. Det kjendest bra, synest lagkaptein Liv Sandven. Dette er det laget har trena mot heile hausten, fortel ho.
– Det var godt å få noko att for arbeidet.
Laget møtte Strandvik IL, Kvernbit IL, Framnes IL, Sotra og Strand-Ulv. Alt i alt gjekk kampane betre enn venta, meiner Sandven. Laget heldt seg på eit godt nivå gjennom heile turneringa, og alle spela bra saman. Kjemien var god, seier ho. I finalen mot Strand-Ulv sundag fekk laget kjenna på meir motstand.
– Me spela mot eit veldig bra lag. Det vart rett og slett litt for tøft. Det var eigentleg som venta, men eg synest me klara oss bra med tanke på motstanden, seier Sandven.
Det heldt i alle fall til ein 2.-plass og plass i noregsmeisterskapen (NM). NM U17 går føre seg i Haugesund 12.–14. april.
Også Rossvoll G17 skal til NM. Laget møtte Strandvik IL og TIF Viking, og vann fire av fire kampar i kvalifiseringa. Lagkaptein Benjamin N. Lid seier det er tredje gongen laget er kvalifisert til NM. Dei to føregåande åra har resultata vore så som så. I år ser Lid lysare på det. Laget er mykje betre i år, meiner han.
– Er det noko spesielt de bør terpa på fram til NM?
– Det er alltid samspel, men også å verta betre individuelt og ta meir ansvar sjølve. Me var gode til det i helga, men me kan alltid verta betre, seier Lid.
