God glid i «Holmatun Grand Prix»
Det var både fart, dramatikk og godt oppmøte i Øystese då Holmatun AS inviterte til kassebilløp laurdag.
Åtte kassebilar med sjåførar mellom 8 og 21 år stilte til start då «Holmatun Grand Prix» vart arrangert for fyrste gong. Og det vert garantert ikkje den siste, ifylgje Morten Garen i Holmatun AS.
– Eg er så nøgd! Me satsar på at dette er starten på noko moro, seier arrangøren.
Garen anslår at om lag 300 personar møtte opp for å sjå dei heimelaga doningane susa ned vegen langs Øysteseelva. Publikum stilte med både flagg og plakatar bak bildekka som markerte løypa frå Kvam ungdomsskule til Øystese idrettshall. Like før brua var det laga til ei utfordring: eit hopp.
Sjå biletserie frå arrangementet nedst i saka.
Hoppet verka å vera meir utfordrande for kassebilane enn for sjåførane. Hoppet resulterte i nokre slitne bakakslingar, eit punktert dekk og ei kvelving, men ikkje eit einaste plaster vart delt ut. Dei fleste redda seg inn med kraftig ratting og eit stivt blikk.
Løpet var delt i to omgangar. Dei som trong det, fekk tid til å justera bilane i pausen, og alle stilte til start att etterpå.
– Bremsa pitte litt
Den yngste deltakaren – og den einaste jenta – var Emely Bjotveit Eknes (8). Ho stilte som nummer 7 av 8, og køyrde seg inn til ein tredjeplass i fyrste omgang – berre eitt sekund bak ein delt fyrsteplass. HF snakka med henne på veg opp til startområdet etter fyrste omgang.
Emely melde seg på løpet fordi ho hadde lyst. Det høyrdest veldig kjekt ut, synest ho.
– Var det moro?
– Ja!
Bilen «Fargerik Triken» har ho laga saman med far sin, Sjurd Eknes, og bestefar, Ingolf Eknes. Jobben har tydelegvis vore god. Ho slapp i alle fall unna justeringar i depotet før den neste runden.
– Bremsa du? spør bestefaren på veg opp att til startområdet.
– Ja, eg bremsa før hoppet. Men det var berre pitte litt, svara Emely.
– Du treng ikkje det neste gong, forsikra han.
Om nokon har fortalt henne at ho ikkje skal høyra på «besten», er uvisst. Emely passerte i alle fall målstreken på nøyaktig same tid i andre omgang, og heldt såleis på tredjeplassen. Kassebilen vann dessutan pris for å vera den sikraste.
Ny klasse neste år
Selmer Storholm og kassebilen «Gulrotbonden» sikra seg fyrsteplassen etter å ha køyrt inn tre sekund i andre omgang. Kassebilen som vann prisen for den finaste, var «Black Pigeon». Sjåfør Johannes Laupsa-Borge (9) hadde nemleg tørka støv av ein kassebil som vart bygd to år før han sjølv vart fødd. Med seg på laget hadde han «Torebesten» (Tore Fykse).
Konstruktøren bak «Black Pigeon», med Ford-merke framme, var ifylgje påmeldinga «onkel Jostein Reodor Fykse Felgen». Bilen var bygd av kryssfiner og «kjekt å ha-delar».
Olve Mæland og «Tempo Mæland» fekk pris for å vera den mest kreative kassebilen.
Fleire i publikum nemnde at no var det berre å setja seg ned og teikna bil til neste års løp. Då vert det ein klasse for vaksne òg, opplyser arrangøren.
