Glede på glattisen
Hjul vart bytte ut med skeiseblad i Vikøy denne veka.
Kulden dei siste vekene isla ikkje berre Skårsvatnet og diverse andre større og mindre vatn i Kvam og Jondal. Med ein del menneskeleg hjelp har det òg lagt seg eit fint lag is på rulleskeisebanen i Vikøy.
Torsdag var det full rulle – eller rettare sagt full glid – då Hardanger Skøyteklubb skipa til den faste treninga. På grunn av arrangement kunne ikkje alle dei trufaste gjestene delta, men eit knippe unge susa rundt og rundt under instruksjon av klubbleiar Brynjulf Måkestad.
Fem tusen liter
Isen vart lagd av Måkestad og klubbkollega Eric Clement måndag kveld. Clement køyrde rundt banen med ein vasstank på tusen liter på ein tilhengar. Fem tusen liter vatn frå ein hydrant og halvannan times innsats gjekk med. Eit tau langs banen held vatnet på rett plass. Etter snøfallet tysdag stilte Henning Eick opp med snøfresar og fekk banen klar til bruk.
Isen var ikkje av det glattaste slaget torsdag, men Måkestad og Clement vatna han med eit par tusen liter seinare på kvelden for å glatta han ut. Fredag kom eit nytt snøfall, så snøfresaren må fram att for å få banen brukande. I det store og heile er det ein del arbeid for å ha brukande is. Og utan minusgrader finst inga von.
Ifylgje Måkestad, som sjølv har gjennomført fleire økter på isen, er det aller meste likt reint teknisk med å gå på vanlege skeiser og på rulleskeiser. Likevel slo Shams, som prøvde lengdeløpsskeiser for fyrste gong, at kjensla var ei heilt anna enn med hjul under føtene. Og lettare var det ifylgje henne i alle fall ikkje.
Stor framgang
10–12 born og unge på strekkja Tørvikbygd–Øystese er med på treningane. Klubben reiser om vinteren til Slåtthaug kunstisbane i Bergen for å trena ein gong i veka. Ikkje alle kan vera med, for turen tek gjerne fire timar.
Ein av dei som har hatt størst framgang i klubben, er Nantawat Duangkaew (14). Han formeleg susa rundt og rundt på isen. Han har gått på skeiser i om lag tre år, fortel han til HF.
Ifylgje Måkestad er han den løparen i klubben som har hatt størst framgang. I Austevollsprinten på Slåtthaug nyleg gjekk han 500 meter på 55,52 sekund, som er ny personleg rekord. Kilometeren la han bak seg på 2.01,09. Prestasjonane held til 3.-plass i klasse junior C.
Lys og tak
Skeisebanen er allereie lyssett. Mellom banen og Framnes Arena har det reist seg eit grindbygg som løparane etter kvart kan nytta. Legginga av skifertaket er i gang. Kostnaden er om lag 100.000 kroner, pluss dugnadsarbeid. Kvam herad og Sparebankstiftinga Hardanger finansierer prosjektet, fortel Måkestad.
Bygget vil få vegger på to av sidene og verta tilkopla til kraftnettet, og kan nyttast sommarstid til dømes til grilling, ifylgje eldsjela.
