Glattisen er klar
Kulda har gjort at det har dukka opp skeisebanar fleire stader i Kvam.
Ålvik Idrettslag har laga til bane på idrettsplassen i bygda. Lagleiar Camilla Cithona Gangdal fortel at isen var klar fredag kveld. Idrettslaget har lagt det Gangdal kallar vegduk under grusen. Så har brannbilen til Elkem Bjølvefossen spruta vatn på området.
– Me byrja spruta vatn på området allereie på måndag. For at isen skal verta fin, trengst det fleire lag med vatn. Me prøver å laga is kvart år, men det er lenge sidan den har vore så fin som i år, seier ho.
Vêret bestemmer kor lenge isen skal liggja.
– Isen toler korte periodar med mildare vêr, men no ser langtidsvarselet veldig bra ut. Me kan uansett fylla på med meir vatn dersom det er naudsynt, seier Gangdal.
Hardanger Skøyteklubb har lagt is på rulleskeisebanen i Vikøy. Klubbleiar Brynjulf Måkestad fortel at isen var klar natt til fredag.
– Me byrja torsdag kveld, og isen var klar om lag klokka eitt om natta, fortel han.
Skeiseklubben brukte ikkje brannbil, men i staden ein vanleg bil med ein stor vasstank på ein hengar. Ein såkalla spreiebom spreidde vatnet utover banen.
– Me køyrde på om lag 6.000 liter vatn. No har me eit islag på om lag to centimeter, fortel Måkestad.
Klubben har også vore med på å laga is på ein bane ved Lyso i Tørvikbygd.
