Gjorde hat trick på 18-årsdagen

A-laget Øystese/Norheimsund har hatt ein dårleg start på fotballsesongen i 4. divisjon. Etter 3–6-tap mot Osterøy i sesongopninga enda førre kamp med 0–5-tap mot Sotra 2. Kvemmingane var tabelljumbo.

Det stressa likevel ikkje trenar Denis Ljubovic før oppgjeret laurdag.

– Eg har trua og spelarane har trua, sa Ljubovic.

Og det med rette.

Også B-laget spela kamp laurdag. Sjå bilete frå fotballkampane her:

Tung start

Knapt minuttet var gått då det fyrste målet vart servert av Radøy-spelar Alexander Stautland Valdersnes på Øystese stadion. Målet såg likevel ikkje ut til å påverka det lokale fotballaget i særleg grad. Heller ikkje mål nummer 2 i kampen, som ifylgje fotball.no var eit sjølvmål av Kasper Wilhelmsen Botnen berre nokre minutt etterpå, såg ut til å vekkja kamplysta med det same. Men så kvikna karane til.

Etter gode målsjansar frå både Gabriel Alain Ramsay og Marcus Dalseide sat skotet til slutt for sistnemnde kring 30 minutt ut i kampen. Like før pause utlikna Kasper Wilhelmsen Botnen til 2–2.

I garderoben fekk Øystese/Norheimsund-spelarane beskjed frå trenaren om å halda fram slik dei spela den siste halvtimen av fyrste omgang. Beskjeden vart teken på alvor.

Ein stor dag

Berre 3 minutt inn i andre omgang skåra Dalseide nummer 2 for dagen. Tre minutt etterpå kom mål nummer 3, som også var det siste i kampen. Spelaren frå Austevoll enda med andre ord med hat trick i sigerskampen.

– Korleis kjennest det?

– Det var veldig gøy å vinna. Me trong dette for laget, både for motivasjonen og for poenga sin del, seier Dalseide etter kampen.

– 2 mål imot frå start. Korleis påverka det dykk?

— Det er jo ikkje moro. Det merkast på heile laget. Me vart litt sure på kvarandre. Men me har snakka om det – me har jo hatt 2 tap på rad. Me kan ikkje falla nedpå, men må berre stå på, seier Dalseide.

– Kva gjorde at kampen snudde?

— Me jobba hardare og ville det meir enn dei. Me sprang òg meir, og gjorde det som må til, seier målskåraren.

Austevollingen, som er skuleelev på Framnes, hadde mykje å feira etter kampen. I tillegg til 3 mål fylte fotballspelaren 18 år på kampdagen.

Tap for B-laget

Også B-laget til bygdene, Norheimsund/Øystese, spela kamp laurdag. På Norheimsund stadion møtte spelarane Valestrand Hjellvik. Før kampstart sa trenar Christian Kjosås at fleire rutinerte spelarar skulle stilla til start samanlikna med tidlegare.

– Me har vore litt «lette» dei 2 fyrste kampane, og treng litt meir rutine. Eg håpar dei rutinerte vil bidra godt i vår og utover hausten, sa Kjosås.

Trenaren, som sjølv spela kampen, fortalde at han har trua på ein god kombinasjon av unge og rutinerte. Han sa at spelarane har hatt ei god utvikling dei 2 siste vekene, og at det ser positivt ut.

– Me går for 3 poeng! la Kjosås til.

3 poeng vart det likevel ikkje. Samarbeidslaget enda med å tapa sin 3. kamp på rad. Stillinga vart 3–0 til bortelaget. Trenaren hadde likevel mykje positivt å ta med seg vidare, seier han etter kampen.

– Me kom til sjansar, men mangla dei siste detaljane. Og dei unge spelarane hevda seg godt, seier Kjosås.