Gjekk til topps i Sandnes
Sigrid Norheim frå Kvam vann langrennsfinalen på Blinkfestivalen i Sandnes laurdag morgon.
64 hundredelar var marginen hennar til den nest beste løparen i klassen J10–11 på rulleskifestivalen. 12 deltok i klassen. Også Sunniva Henriksen Vestbø kvalifiserte seg for langrennsfinalen. Ho hamna på 12.-plass.
– Det var veldig kjekt, seier vinnaren på telefon frå matkøen ei stund etter finalen.
Norheim driv med skiskyting, men fortel at ho ikkje er gamal nok til å delta i skiskytinga på Blinkfestivalen. Ho hadde ikkje rekna med å vinna langrennstevlinga, ettersom ho vart nummer 3 i både prologen og fellesstarten fredag. Sigeren kom dimed uventa, men gledeleg på henne.
Norheim og familien bur i eit lånt hus medan dei er på festivalen, som dei reiser heim frå laurdag. Fredag var ho med og såg på landslagsutøvarane i skiskyting. Elles syter eit stort kjøpesenter i området for sysselsetjing.
Fredag vart Norheim som nemnt nummer 3 av 17 i fellesstarten, 3,97 sekund bak vinnaren frå Ørnar. Vestbø vart nummer 13 og Maylinn Hellene Fonneland nummer 15. I den tilsvarande guteklassen vart Jørgen Måkestad nummer 13 og Asbjørn Norheim nummer 24 av 26 deltakarar.
Synneva Laupsa Mo vart fredag nummer 6 i skiskyttarsprinten i J13–14, der 17 deltok. Philomene Möller vann klasse J15–16, der ho var einaste deltakar.
I alt 13 kvemmingar var med på tevlingane i Sandnes fredag og laurdag, og fleire oppnådde gode resultat. 10 var med på Lysebotn Opp torsdag, opplyser Gerd Ingrid Dukstad Norheim på vegner av Kvam Langrenn- og Skiskyttarklubb.
