Gjekk på jobb – vart kvalifisert til NM

Det fortalde Hannah Bergtun Markhus kort tid før ho torsdag kvalifiserte seg til noregsmeisterskapen i vassklie i Orkdal, sør for Trondheim.

Markhus er til vanleg tilsett i Hardangerbadet og avgangselev ved Framnes Kristne Vidaregåande Skule. Torsdag stilte ho også som deltakar i NM-kvalifiseringa i vassklie. Ho hadde ingen forventingar om siger.

Det var fem påmelde i herreklassen og tre i kvinneklassen. Markhus ynskte å delta sidan så få var med i kvinneklassen. Men rett før start fekk ho større konkurranse. Ei anna melde seg på i siste liten.

Gjev frå seg billetten

Badevakta stakk av med sigeren etter tett konkurranse, med tida 5,46 sekund. Det var knappe sju hundredelar før 2.-plassen. Markhus var nøgd med resultatet. Ho valde likevel å gje frå seg NM-plassen til nestekvinne på pallen.

Vilma Vence overtok dermed førsteplassen. Ho lova å reisa til Orkdal og delta som representant for Hardangerbadet. Ho fekk 4.000 kroner som ho skal bruka til å koma seg til NM.

Markhus fortalde at ho måtte gje frå seg NM plassen fordi ho skulle delta i russerevyen på skulen.

— Ein kan ikkje vera med på alt som er kjekt, seier ho med glimt i auga.

Litt på trass

Gunda Kyte (56) var ei av dei andre som deltok. Ho fortalde at ho vann førre gong det var kvalifisering til NM, for to år sidan. Dermed ville ho delta også torsdag. Sist gong meisterskapen vart avvikla, var ho i Hardangerbadet med dottera og barneborna utan å vita om tilstellinga. Dottera hadde ymta frampå om at dersom mora vart med i konkurransen, skulle ho få ei flaske vin.

Til årets meisterskap var det ikkje vin som freista Kyte. I år var det heller ei prinsippsak. Det var fleire kjende og familie som meinte at det var veldig flautt at ho skulle delta. 56-åringen ville likevel ikkje lata seg stoppa av dette, og ville heller ikkje lata alderen hindra henne i å ha det gøy.

Favoritt innfridde

Mellom dei som stilte til start i herreklassen, var favoritt Johan Larsen Aksnes. Han har den offisielle sklierekorden i Hardangerbadet. Aksnes er i anlegget tidt og ofte, under påskot av at han likar å symja. Han kan finnast dagleg i bassenget.

(Bladfykane undrast likevel over om dette berre var eit skalkeskjul for å terpa på teknikken i sklia. Han påstod likevel at han berre er med på gøy.)

Herrane kasta seg utfor ein etter ein. Aksnes imponerte frå første runde og hamna i leiinga. Dei som ikkje deltok, følgde godt med på kva dei andre gjorde og på tidene deira. Markhus kunne stadfesta at det var god stemning på toppen av tårnet, sjølv om det berre var snakk om ein plass i NM.

Det viste seg at Aksnes stakk av med sigeren med tida 4,77 sekund. Dette var berre to hundredelar frå den gamle rekorden hans på 4,75.

Han var likevel ikkje heilt suveren. Det var nemleg eit lyn frå Strandebarm som fekk tida 4,90 i sitt siste forsøk. Erik Johansen tok turen til Hardangerbadet saman med dottera. Målet for dagen var å koma under 5 sekund, noko han klarte med glans i siste renn.

Mellom slaga arrangerte Markhus ein spontan skliekonkuranse for dei yngste i Hardangerbadet. Dette var eit svært populært arrangement for borna, som stilte opp i hopetal. Arrangøren vonar at det i framtida kan verta ein litt meir seriøs barneklasse der borna får konkurrera om meir enn heider og ære.

Artikkelforfattarane er elevar som tek mediefaget ved Framnes Kristne Vidaregåande Skule. Red.