Garen med draumedebut: – Ei stor tillitserklæring
Leah Skeistrand Garen (17) var glad berre for å få trena med A-laget. Så enda det med skåring i debuten.
– Då eg fekk melding om at eg kanskje kunne koma innpå, var eg ganske stressa, men då eg stod klar til å springa ut, forsvann nervane.
Det seier kvemmingen til HF dagen etter at ho debuterte for A-laget til Brann i Toppserien. Det enda med hennar fyrste mål i timålssigeren mot Arna-Bjørnar i Arna Idrettspark laurdag.
Artikkelen held fram under annonsen.
Berre 5 minutt etter at ho hadde kome på banen, fekk ho etter litt klabb og babb ballen med seg og kom åleine mot målvakta. Kaldt plasserte ho han i nettet med venstrefoten og sikra 8–0-leiing.
Høgdpunkta i kampen kan du sjå her (målet til Garen kjem etter 2.21 minutt):
Trenar med stjerner
Garen seier ho har fått vera med og trena ein del med A-laget dei siste vekene. Likevel var det uventa både å vera i troppen og ikkje minst å få sjansen.
– Det betyr kanskje at eg har gjort det bra og at eg er der av ein grunn. Det er ei stor tillitserklæring berre å få lov til å vera med og trena med A-laget, seier Garen.
Då ho melde overgang frå Norheimsund/Øystese til Brann tidlegare i vår, låg det i korta at ho skulle spela for Brann 2. Det har ho gjort, men sjansen til å eta kirsebær med dei store kom altså raskare enn venta.
Etter brakdebuten rann det inn meldingar frå både kjende og ukjende. Det motiverer henne.
– Det er veldig motiverande at folk fylgjer med, og kjekt om eg kan vera eit slags førebilete for jentefotballen i Kvam.
Støtter kring seg
Ho har funne seg til rette i den nye klubben. Pendlinga frå Kvam var litt slitsam i starten, men etter kvart har ho funne ein tenleg balanse i kvardagen. Pappa Morten eller kjærasten hennar er sjåførar, om ikkje ho tek buss.
Artikkelen held fram under annonsen.
Båe dei nemnde støttespelarane var på plass på tribunen i Arna Idrettspark laurdag. Morten stakk seg faktisk såpass ut med jubel etter skåringa at BT forstod at mannen burde verta intervjua, fortel dottera og ler.
Til hausten er planen hennar å flytta til Bergen og byrja på NTG Bergen. Då vert det meste ein del enklare.
Garen seier at ho og medspelarane på Brann 2 vert godt fylgde opp av klubben. Det langsiktige målet for både henne og dei andre er å verta framtidige toppspelarar for A-laget, forsikrar ho.
– Eg tek det trening for trening. Kvar trening med A-laget er ei gåve. Det er stort å få vera med der, seier Garen.
Godt i gang
Også Ellinor Blåsternes (17) kom innpå og debuterte for A-laget laurdag.
– Eg synest båe gjorde det bra. Dei handterte nervane veldig bra, og spesielt Leah er veldig roleg. Eg er glad på vegner av båe, seier trenar Martin Ho til Bergens Tidende.
Brann ligg på 3.-plass med 15 poeng i Toppserien, 6 poeng bak Vålerenga.
Brann 2 har gjort det godt i serieinnleiinga, og har enno ikkje bokført eit einaste poengtap etter 6 kampar. Garen har spela ein god del. Sundag starta ho og spela halve kampen for Brann 2, som vann 8–2 mot Åsane 2. Denne dagen vart det inga skåring. Såleis har ho faktisk skåra fleire mål for A-laget enn for B-laget til storklubben i Bergen.
Artikkelen held fram under annonsen.
– Eg var litt sliten etter mange inntrykk laurdag, seier Garen.
Les også:
