Futsallag vann 1. divisjon
Futsallaget til Norheimsund vann to av tre seriekampar i helga. I mars skal futsallaget spela om plass i Eliteserien Futsal.
Lagleiar og spelande trenar Eivind Madsen Skeie fortel at kvammalaget hadde alt i eigne hender før helga. Dei andre topplaga skulle møta kvarandre og Norheimsund skulle spela mot lag som kvammalaget stort sett skal slå, fortel Skeie.
I fyrste kamp møtte Norheimsund eit av dei andre topplaga, Bergensdalen 1. Bergensdalen 1 har fleire spelarar som har vore på vinnarlaget i julecupen i Norheimsund dei to siste åra, opplyser Skeie.
Norheimsund tapa kampen 0–2. Ifylgje Skeie var kampen jamn, men personlege feil gjorde at Bergensdalen 1 trekte det lengste strået. Det medførte at Norheimsund måtte vinna dei to siste kampane for å vinna serien. I neste kamp, mot Valestrand Hjellvik, vann Norheimsund 5–0. Lars Lundblad Vestbøstad debuterte og skåra 1 mål.
I siste kamp møtte kvammalaget Melkeplassen. Norheimsund vann 10–0 mot Melkeplassen tidlegare i sesongen. Skeie fortel at kampen var jamn. Melkeplassen tok leiinga tidleg. Kasper Wilhelmsen Botnen utlikna etter 6 minutt. Seinare i kampen skåra Sebastian Skåre Tune 2 mål. Fleire mål vart det ikkje. Norheimsund vann 3–1 og vann 1. divisjon.
15–16. mars skal laget spela kvalifisering til Eliteserien Futsal. Kvalifiseringa går føre seg i Grorud. 2 av 8 lag rykkjer opp.
– Eg vil rykkja opp, understrekar Skeie.
Skeie fortel at eit eventuelt opprykk vil gjera til at laget treng fleire sponsorar. Kampar i Eliteserien Futsal krev meir reising og pengar, forklarar Skeie.
– Eg har spela i Eliteserien Futsal før. Det er mykje kjekkare enn å spela i 1. divisjon, seier Skeie.
Siste helga i mars skal laget reisa til Stjørdal og tevla om kongepokalen i noregsmeisterskapen.
