Full fres på Sjusete: — Over all forventing
Måndag kveld møtte kring 50 ivrige skiglade til start då fyrste serierenn i langrenn vart avvikla på Sjusete.
— Det gjekk over all forventing!
Det sa leiar Jan Tore Tveit for Sjusete skisenter då HF snakka med han torsdag føremiddag. Han var rennansvarleg då Kvam Langrenn- og Skiskyttarklubb arrangerte serierenn i langrenn måndag kveld.
Ifylgje Tveit er det vanleg med oppstartsvanskar når det fyrste rennet for sesongen vert avvikla, men slik vart det ikkje denne gongen.
— Gjennomføringa gjekk veldig bra. Alt fungerte som det skulle, inkludert tidtakinga. Me var heldige som fekk med oss ein erfaren tidtakar som Jostein Auganæs, sa Tveit.
Til start stilte 48 løparar i alderen 4—35 år. Medan det var skralt oppmøte frå den eldre garde, var det mange ivrige born som heiv seg med.
Ifylgje rennleiaren var det stor skiglede å sjå hjå dei frammøtte. Mange av dei yngste var så ivrige at dei tok ein ny runde då dei var ferdige med sjølve rennet.
Torsdag føremiddag melde Tveit om 40—50 centimeter nysnø og fantastiske tilhøve i løypene. Kjosås-løypa er preparert for fyrste gong denne sesongen. Dersom det held fram med å snø, vonar Tveit å få gjort klar Nystøl-løypa òg.
