– Freistar til oppattaking

28 born i 6.–8. klasse fann vegen til Strandebarm Sportell.

– Det var kjekt. Ein fin gjeng, seier skiklubbutviklar Anne Lise Leiren Mastervik i krinsen.

Deltakarane kom frå Bergen, Fana, Granvin, Odda, Osterøy, Samnanger og Voss.

Krinsen har ein haustcamp ein gong i året. I år kunne 2010–2012-modellar delta. Tidlegare har campen vore på Bømoen på Voss, men i år vart skifolket skvisa ut av «Kompani Lauritzen», seier Leiren Mastervik.

Idrettsleiarane funderte på kvar dei skulle leggja haustcampen for å få mest mogleg aktivitet og variasjon. Dei landa på Strandebarm, og vart svært nøgde med det. Noko av målet med haustcampen er å samla born som driv med forskjellige skiidrettar. Det er ikkje ei greinspesifikk samling, og det er viktig at ein er allsidig.

Fredagen starta med øvingar à la «Mesternes mester». Deltakarane vart delte på tvers av laga, for at dei skulle kunna verta kjende med nye. Øvingane var springing, bering, kasting og «90 grader». Etter vart det utdelt premiar. Alle fekk deltakarpremie, såkalla motivasjonsdrikkeflasker, for å få i seg nok væske.

– Mykje trening i leik

I den fyrste økta laurdag stod hallaktivitetar på programmet, med fleire basisøvingar i styrke og kondisjon. Det er viktig at øvingane er lystprega, meiner Leiren Mastervik. Det er utruleg kor mykje god trening ein får i ulike typar leik, seier ho. Ein kan boltra seg på ski, til dømes, eller hoppa og springa på ulike måtar.

Den andre økta laurdag var kanotur. Ein gjeng padla oppover elva, og det vart på eit tidspunkt for grunt, då det var fjøre sjø, og nokre sette seg fast. Det var berre å koma seg laus og hoppa opp i kanoen att.

Laurdag fekk skigåarane nytta bassenget. Sundag var det ei økt som var meir greinspesifikk. Dei som driv med langrenn, var for seg, og dei som driv med alpint, for seg.

Fem instruktørar

På sportellet vart det avvikla romkonkurranse, med premiar for kreative løysingar for å ha det ryddigaste rommet. Nokre hadde blomar på rommet, medan andre hadde lufta godt. På enkelte rom var det reine hotellstandarden, med oppreidde senger.

Leiren Mastervik og dagleg leiar Bernt Rusten i Hordaland skikrins – han er frå Sunnhordland – var leiarar og instruktørar. Magnus Hesjedal Hartwig frå Fana, Jonas Hauger frå Norheimsund og Jonas Engevik Vørøs frå Stord var instruktørar.

Samlinga var foreldrebetalt.

– Fekk de god mat?

– Ja, eg kan ikkje seia anna. Det var knallgod lasagne, og maten var punktleg. Ingenting å klaga på, og det var god sørvis. Det freistar til gjentaking neste år, seier Leiren Mastervik.

– Fasilitetane var fantastiske, dei òg, seier ho.

– Så gode fasilitetar i ei lita bygd – det er spesielt. Det er ein flott hall, gymsalar, basseng, løpebanar, skogsløype, supert å bruka rulleski på bilfritt område, og sjøen – det gjev så mange moglegheiter for ei samling, seier Leiren Mastervik, som kjem frå Stamnes i Vaksdal og bur i Arna.