Frå liksomskyting til bassengdisko
Ung Fritid (UF) byr inn til ferieaktivitetar i veke 33, opplyser Kvam herad.
Opplegget er for born og unge i Kvam som er mellom 11 og 18 år, medrekna dei som er fødde i 2009 og tidlegare.
Måndag 10. august kjem Fana Paintball på besøk i Steinsdalen. Klubben har med seg gevær og anna utstyr. Det vert eit adrenalinfylt spel i trygge omgjevnader, lovar UF. Paintball er for dei i alderen 12–15 år og 16–18 år.
Tysdag 11. august vert det bowling og pizza for heile familien i Hardangersenteret i Øystese. Medtilskipar er Kvam Bowlingklubb. Torsdag 13. august vert det same aktivitet for dei i alderen 13–18 år.
Onsdag 12. august vert det Pool Party i Hardangerbadet i Øystese. UF lovar disko, dødsing, paraplydrikkar og sommarvibber. Alle mellom 13 og 18 år er velkomne, medrekna dei som byrjar i 8. klasse til hausten. Ein må kunna symja for å vera med.
Fredag 14. august vert det familiekino i Kvam Kino i Norheimsund med sykkeleventyret Elleville Elfrid. Ho dreg ut for å finna att bestevenen som har rømt.
Ung Fritid er eit samarbeid mellom Kvam herad, Grannehjelpa og lokale frivillige lag og organisasjonar.
