Fotball frå morgon til kveld

Det var eit yrande liv på kunstgrasbanen frå klokka 9 om morgonen til om lag klokka 18.30 om kvelden sundag. Lag frå Strandebarm, Norheimsund, Øystese og Ålvik møttest til venskapleg dyst i den tradisjonsrike turneringa. Faktisk var heile 40 lag påmelde, men nokre av dei melde avbod.

Vêrgudane spela på lag med arrangørane. For det meste var det opphaldsvêr. På sidelina samlast fleire generasjonar for å fylgja med på mellom anna sjarm, talent og klassisk klyngjespel på dei tre banane.

Sjå glimt frå dagen her:

På langtur

Olai Skålnes Bergheim (10) og Vilja Skår Linga (11) spela for mikslaget til Strandebarm. Dei er temmeleg sikre på at dei slo Øystese i den fyrste kampen, som dei hadde spela då HF snakka med dei, og sikre på at åtte spelarar var med til Ålvik. Alt i alt er det kjekt å vera på cup, forsikrar fotballspirene.

– Det er ikkje kjedeleg å venta på kampane?

– Ikkje når me har klatrestativ og venene våre her, seier Vilja.

– Kven er trenar for laget?

– Dan og onkel Eivind. Men ingen av dei er her i dag, seier Olai.

– Dei har sikkert ikkje tid, seier Vilja.

– Dei var i bursdag i går. Men dei kjem, trur eg, seier Olai.

– Aldri gje opp!

Morten Kristiansen (8) var ein annan ivrig cupdeltakar. Han er målvakt for Øystese og spela fire kampar. Mellom stengene har han tenkt å bli.

– Målet er å verta ein skikkeleg god keeper.

– Kva skal til for å verta god?

– Aldri gje opp! Det er kanskje alt.

– Må du ikkje ha god spenst?

– Jo, eg må vera sterk i føtene for å slengja meg og hoppa opp.

– Har du eit favorittlag?

– Ja, Manchester United!

– Plar du sjå kampane?

– Ja, men eg får eigentleg ikkje lov av pappen. Han heiar på Tottenham, så eg skal sjå Manchester United mot Tottenham.

– Kvifor heiar du på United?

– Keeperen, David de Gea, er veldig god. Og Ronaldo.

– Kven er favorittkeeperen då? Kanskje Alisson?

– Nei takk, det trur eg ikkje. Eg trur det er David. Og Ederson. Litt begge, kanskje.

– Vert du sur når du slepper inn mål?

– Nei. Berre eg slengjer meg og gjer det eg skal, er det greitt.

Fotball døgeret rundt?

Langs Trånavegen og ved Folkets Hus stod bilane tett i tett. Så mange lag deltok at folk måtte reisa heim for å baka fleire kaker undervegs, fortel Inger Marie Lilletveit i Ålvik Idrettslag. Ei lang rekkje frivillige – domarar, kampvertar, kioskpersonell og bakarar – stilte opp for å avvikla arrangementet. Cupgeneral var Kenneth Offerdal.

Leiar Camilla Gangdal i Ålvik Idrettslag fortel at kunstgrasbanen er mykje i bruk til både organisert og uorganisert aktivitet. Like ved banen, på grusen, er det tidlegare kome på plass eit klatrestativ som Hans Pulles har designa. Gangdal opplyser at idrettslaget arbeider med å utvikla området vidare, kanskje med ein liten fotballbane til og ein sandvolleyballbane. Laget har allereie fått på plass nye lys i mastene ved banen, og no kan brukarane slå på lyset sjølve med ein knapp på Idrettshuset.

Lysa vart finansierte gjennom ein Spleis-aksjon, og aksjonen resulterte igjen i at prosjektet vart trekt ut til å vinna 10.000 kroner som P4, Sparebank 1 og idrettsforbundet står bak.

– Det er litt artig å kunna seia at lysa våre er sponsa av P4, seier Gangdal.