Firedobla talet på deltakarar

I fjor var eit dårleg år for Øystesetrimmen. 30 personar deltok i trimklassen, medan konkurranseklassen vart avlyst fordi berre éin deltakar melde seg på. Øystese idrettslag står bak trimmen, og styreleiar Eirik Kvarv, som sjølv deltok, fortel at dei siste åra har trimmen gått av stabelen anten saman med Kvammaveko eller saman med Siderfestivalen.

– På den måten håpa me å få ekstra draghjelp av at det var andre arrangement samstundes, fortel han.

I år vart trimmen arrangert frittståande på ein onsdag. Det såg ut til å fungera fint. 10 vaksne deltok i konkurranseklassane for vaksne, medan det var 8 deltakarar i konkurranseklassen for born.

Om ein reknar borna i konkurranseklassen med i trimklassen, hadde trimklassen 121 deltakarar.

– I år var det fleire deltakarar enn det har vore dei siste åra. Sjølv om me ikkje har hatt styremøte etter løpet, er det gode moglegheiter for at me kjem til å halda fram med å arrangera Øystesetrimmen åleine på ein kvardag, fortel Kvarv.

Det om lag 5,4 kilometer lange løpet, som har start og målgang ved idrettshallen i Øystese, har lange tradisjonar.

– Løpet var langt større tidlegare. Men då må me 20 år eller meir attende i tid, fortel Kvarv.

Erlend Drivenes vann herreklassen. Han kom i mål på 19.51. Torild Kveberg vann dameklassen med tida 26.43.

Jakob Aarekol Botnen vann klassen herrar junior med tida 21.37. Med det slo han faren Odd Arne Botnen, som kom på 4.-plass i herreklassen, med eit par tidelar.

Klassane på Øystese barneskule konkurrerte om kven som hadde flest deltakarar. Vinnaren vart klasse 3B, der 45 prosent av elevane deltok.