Finalefest i regnvêret

Ei rekkje lokale skyttarar er klare for finale på Landsskyttarstemnet i Stjørdal. Aller størst vinnarsjanse har truleg Åmund Kolltveit, som har gjort det godt i alle greiner.

Så mange er dei finaleklare at det nesten er motlaust å ramsa dei opp, men me gjer ein tapper freistnad likevel. Hardanger-skyttarane fyrst:

• Johannes Skaar Bakke er klar for finale i klasse veteran 73 i både felt- og baneskyting etter å ha skote fullt hus i båe greinene.

• Årets vestlandsmeister Arne Berge, som har skote ellevilt godt i år, er klar for banefinalen i veteran 65 med 250 poeng. Han ligg på delt 13.-plass før finalen tysdag kveld.

• Henry Øye får plass på skive 3 i banefinalen i veteran 55, med 247 poeng. Ingen fekk fleire poeng i klassen. 6 presterte det same resultatet som Øye. Finalen er tysdag morgon.

• Kjetil Skår og Harald Brekke er klare for feltfinalen i klasse 3–5 etter å ha prestert fullt hus i feltløypa.

• Åmund Kolltveit er klar for banefinale i klasse 2 med 241 poeng, og for feltfinale som einaste skyttar i klassen som presterte 30 treff. Finalen er fredag. Som om ikkje det var nok, vann han feltsnøggskytinga i klassen med 8,29 sekund, og hamna på delt 2.-plass i stangskyting med 19 treff.

• Også Olav Ludvig Håbrekke er klar for banefinale i klasse 2 med 242 poeng.

• Amalie Eide Aase prikka inn 30 treff i feltløypa og er klar for finalen i rekruttklassen.

• Isak Helland Måkestad er klar for finale i eldre rekrutt med 249 poeng.

• Joakim Øye er klar for feltfinale i juniorklassen med 29 treff.

Jondalssuksessar

Så var det jondølingane sin tur:

• Sverre Krutnes er finaleklar i veteran 65 med 250 poeng.

• Nils Lothe er nest best i klasse veteran 73 og dermed klar for finale i veteran 73, med 250 poeng. I tillegg er han klar for finalen i feltskyting med 30 treff, ein prestasjon han deler med lagkamerat Lars Færevåg fekk.

• Torleif Storhaug får skyta banefinale med 249 poeng i veteran 73.

• Bjørnar Wikane og Liv Sollesnes kan førebu seg til feltfinale i klasse 3–5, med 30 treff.

• Per Johan Mælen er klar for finale i klasse 2 med 29 felt-treff.

• Ana Marie Lilleås får skyta banefinale etter å ha fått 249 poeng i eldre rekrutt.

Det store dronninghåpet frå Jondal, Liv Sollesnes, skyt på banen i dag.

– Over all forventning

Leiar i Jondal skyttarlag, Bjarne Sollesnes, er nøgd med at mange skyttarar frå laget allereie har finaleplassar i lommene.

– Det har eigentleg gått over all forventning for skyttarane våre. Dei første som skaut, gjorde det bra, og det verkar som om dei andre hengde seg på. Det er rart med det; når nokon gjer det bra, så kjem gjerne dei andre i flyten òg. Dessutan har me trena godt og førebudd oss skikkeleg. Eg trur det er ei viktig årsak til at resultata har vore gode, seier han.

Sollesnes ser fram til at skyttarane i klasse 5 skal skyta dei innleiande rundane i dag.

– Det er ein av dei store dagane og den dagen det er mest folk til stades. Presset gjer at fleire skyttarar plar prestera nokre hakk dårlegare på Landsskyttarstemnet enn dei gjer på andre stemne. Får Liv Sollesnes og Bjørnar Wikane til dei same resultata dei har hatt i fleire tevlingar før Landsskyttarstemnet, skal det verta svært spanande å sjå korleis det endar, seier han.

Alt godt, minus vêret

Leiar Dag Skår i Hardanger skyttarlag, som sjølv fekk 26 treff i felttevlinga og avfyrer skota på banen i dag, har berre gode ord å seia om arrangørane. Stjørdal debuterer som arena for årets høgdepunkt for skyttarane.

Mange av dei lokale skyttarane – endåtil ein i telt – bur på «fellescampen» og har rotta seg saman. Mellom regnbyene, som det var ein heil del av dei fire fyrste dagane av stemnet, kosar skyttarane seg med sosialt samvær, tradisjonell bortforklaring – «me er gode på det», fortel Skår – og kubbspeling.

– Me har det bra på alle måtar, sjølv om me har vore litt uheldige med vêret. Det har vore nokre netter med skikkelege rotbløyter, seier lagleiaren.

Han fryktar ikkje tilstandar som på det negativt legendariske Lesja-stemnet i 1985, då traktorar måtta hala bilar ut av gjørmeholet som campingplassen etter kvart utvikla seg til. Det meste, også dreneringa, er lagt godt til rette og godt planlagt, fortel Skår.

Han seier han får ein del kommentarar om det nye skyttarlaget han har vore med på å stifta. Det såg dagens lys ved nyttår. Då Henry Øye var i elden på banen, drog speakeren heile historia om skyttarlaga i Kvam som har slege seg saman. Også den nye banen i Vangdalsåsen har mange fått med seg, seier Skår, som har vore primus motor med mange gode hjelparar i baneprosjektet.