Fekk løyve til løypestell
Jondal idrettslag har fått kommunalt løyve til å preparera skiløyper i jondalsfjella.
Det har laget gjort i ei årrekke, men i gamle Jondal kommune var ikkje prepareringa formalisert. No ynskjer laget å ha alt på stell, og har difor søkt Ullensvang kommune om løyve til løypepreparering i utmark.
Dei tre løypene er turskiløypa Djupadal–Fodnastøl, lysløypa på Storemyr og anleggsvegen inn til Bottsvatnet. Den fyrste og andre løypa vert køyrde med løypemaskin, den tredje preparert med skuter og rulle. Til saman måler løypene 13,6 kilometer. I tillegg har laget køyrt opp ein runde rundt Vassendevatnet med skuter når istilhøva har gjort det mogleg.
Tidsromma for løyvet er 1. januar til 1. mai og frå 1. til 31. desember i 2023–2027, ifylgje Ullensvang kommune. Idrettslaget kan køyra så mange turar som naudsynt.
Mellom vilkåra for løyvet er at det krevst bruk av slede og eit transportbehov av eit visst omfang. Løyvehavaren må sjølv innhenta samtykke frå aktuelle grunneigarar.
