Fekk endeleg opna sesongen på Folgefonna

– Det har gått kjempebra. Folk smilte frå øyra til øyra. Det er ein del som har gått og venta i fleire dagar på å få koma seg på ski, så det var kjekt å få gje dei den gleda, seier Iversen etter sesongens fyrste opningsdag.

Måtte utsetja

Planen var å opna fredag, men det gjekk i vasken på grunn av mykje vind dagen før. Snøen i heistraseen måtte ryddast vekk før ein kunne opna. Laurdag føremiddag var alt klart då om lag 120 gjester kom til skisenteret, men dei vart møtte av så lågt skydekke og dårleg sikt at dei etter kvart måtte snu fordi det ikkje var forsvarleg å opna trekket.

Heller ikkje sundag baud på strålande vêr, men godt nok til opning. Og snøtilhøva var strålande etter snøfallet dei siste dagane. Vel hundre gjester var innom i løpet av dei fire opningstimane sundag. Dei kom frå «litt overalt», fastslår Iversen.

Fonna har uvanleg mykje snø i år etter ein nedbørrik vinter. Kor lenge han kan vara, torer ikkje Iversen å spå om. I 2015, då det var mykje snø, men mindre enn i år, var senteret ope til september. Viktigast for levetida til snøen er sommartemperaturen, og Iversen konstaterer at prognosar tilseier ein noko kaldare start på sommaren enn normalt. Det lovar godt for drifta.

– Skal vera skikkeleg

Skisenteret har fått løyve av Ullensvang kommune til å halda ope, men ikkje med fleire enn 300 gjester per dag. Alle må kjøpa kort på nett. Skiutleiga, kafeen og parken er stengde, men toaletta er opne – med vask ein gong i timen. Alle må bruka hanskar, pluss buff framom nasen og munnen dersom dei er i område med fleire andre. Elles gjeld vanlege smittevernreglar om mellom anna avstand.

Iversen seier det gjekk heilt greitt å etterleva føringane.

– Det skal vera skikkeleg og rett. Det er vår jobb å følgja reglane og leggja til rette, seier Iversen,

Han fortel at skisenteret har fått mange førespurnader på telefon og e-post frå nordmenn som planlegg ferie i eige land. Senteret har vore aktivt i sosiale medium under koronastenginga, og varsla tidleg om den planlagde opninga.

I sommar kjem alpinlandslaget innom tre gonger, pluss snøbrettlandslaget og ymse andre skilag.

– Eg håpar mange hardingar kjem for å stå på ski eller besøkja restauranten vår. Om ein ikkje har vore der oppe, er det spesielt å oppleva landskapet, snøen og isen, seier Iversen.

Vel sunnare veg

Den nemnde restauranten ligg i det nye velkomstsenteret, der handverkarar står på for fullt i desse dagar. Truleg er restauranten klar til bruk i starten av juni, før dei andre elementa følgjer noko seinare. Planlegginga av mellom anna menyen går føre seg for fullt saman med kokk Joakim Jensen, busett i Tørvikbygd.

Iversen fortel at planen er å nytta lokale råvarer, gå bort frå den tradisjonelle skiheismaten – les: pølser, pommes frites og hamburgar – og heller satsa på sunn og næringsrik kost. Faktisk kan ein frå skisenteret med eigne augo sjå kor delar av råvarene på menyen er henta frå.

Mellom anna ein trerettars lunsjmeny, pizza med tynn botn, gourmetburgar og ymse smørbrød vert å få kjøpt. Senteret har dessutan fått skjenkjeløyve. Dei naudsynte prøvane er tekne, og ein har inngått leveringsavtale med eit bryggjeri i Bergen og ein siderprodusent i Hardanger, fortel Iversen.

Ope for alle

Velkomstsenteret har ikkje overnattingsplassar for gjester, men har to mindre og eitt større konferanserom. Planen er å leiga ut bygget til både konferansar og andre samkomer, til dømes bryllaup og dåp. Frå restauranten får gjestene god utsikt mot isbreen. Det største konferanserommet er vendt mot fjorden.

I tillegg hyser senteret utleige og sal av utstyr, pluss lokale for Folgefonni Breførarlag. Laget skal ha senteret som utgangspunkt for dei gaida turane.

– Det vert eit fleirbruksbygg. Og ute har me «auditoriet» vårt, der ein kan gå opp ei trapp og koma til benkerader. Er det fint vêr, er det supert å sitja der, reklamerer Iversen.

Skisenteret held ope dagleg framover så lenge det kjem gjester, fortel han.